زینب تنادي يا عزيز الهاشمية...ابنعش الحسن يحسين ريّض لي شويه

ريّض ابنعش ابن البتوله یا ضیا العين...خلّوه ساعه عد خواته والنساوین
ارحم ابحالي وحالة الأيتام يحسين...لفراق أبو محمد صوايح مستويّه

خلّوه نودعه ومن تشيل النعش بهداي...بالسم چبده امقّطعه ومتفتت احشاي
وحشه عقب عينه يخويه اتصير دنياي...بعد الحسن نغصه حياتي يا شفيه

لبّى طلبها وحفّت النسوه بلا اقناع...حول الجنازه الكل تودعه ابقلب ملتاع
وزينب تنادي ما شبعت امن الأخو اوداع...خلّوا خليصي اتودعه ایتامه اشويّه

شبچت بدیها اعلى النعش وابحرقة افاد...وابصوت عالي اتصيح يا کعبة الوفّاد
تفجع خواتك بالبچا وضجّة الأولاد...وأعظم من فراقك شماتة بني أميه

هلّت ادموعه حسين والمهجه وجيعه...ينظر أخوه ساعه وساعه للوديعه
مختنق بالعبره ونادى أمن الفجيعه...شيلوا أخوكم یا اشبال الهاشميه

شالوا الجنازة وبالبچا ضجت النسوان...حوله خواته اتنوح وارتجت الأكوان
لطمت صدرها وتنتحب کعبة الأحزان...ودعتك الله وبعد ما نرتقب جيّه

سلّم على أمنا یا حسن عني وعن حسين...واسألها عن لطمة العين وعن الضلعين
وخبّرها عن حالي وحالك يا ضيا العين...وحسين شيقاسي بعد من بني أميه