يحسين ودعوني...حسين ودعوني
حان الأجل باجر تفقدوني...يحسين ودعوني

يحسين صح الخبر عن جدي يابن الزجيه
بالسم اموت او تنفطر جبدي بسم المنيه
وانت يخويه تنذبح بعدي بالغاضريه
وسمي شربته...وجبدي قذفته
بوداعة الله ابعجل غمضوني...يحسين ودعوني

انت عقب عيني للمسلمين حجه او رجاهم
وبس الله الله ابعيلتي يحسين انت حماهم
نشف دمعهم من تهل العين سكت بجاهم
وهاي الوديعه...تبجي ابفجیعه
خفوا البواجي لا تفجعوني...يحسين ودعوني

خرت عليه اتنوح وتنادي وهلت دمعها
ضمت اخوها والقلب صادي واحنت ضلعها
حجيك يخويه ذوب افادي وروحي فجعها
قلها يزينب...والقلب يلهب
جيبي الجاسم قرة أعيوني...يحسين ودعوني

صاحت عزیزك يا عزيزي اینوح سكن نحيبه
قلبه يخويه امن الحزن مجروح من هالمصيبه
ضمه الصدره والدمع مسفوح ويشم حبیبه
ونادی يمظلوم...یا بحر العلوم
قبلوا اوليدي من تذكروني...يحسين ودعوني

ايقله يخويه والقلب صادي وجبده وجيعه
يحسين جاسم أعز اولادي عندك وديعه
زوج اوليدي ومهجة افادي قبل الفجيعه
ومدوا ايديه...قبل المنيه
وسدلوا الردا اعليه وسجوني...يحسين ودعوني

وعند الوداع اتباجت الصوبين ذيج النشاما
جملة أولاده تنتحب يحسين صرنا یتامی
وزينب تنادي يا ضيا العين حلو الجهامه
قلبي فجعته...وجسمي نحلته
قولك شعبني وتهمل اعيوني...يحسين ودعوني