وحدة الحسين
بعد الفرح قلبي الترح والف...بس دوبي انشر الحزن والف
لك الحايط اعلى حسين والف...وخوته وعزوته ابحر الوطيه
وفيه
يحق للراس باسرع وكت لو شاب...ويحق للقلب بالاحزان لو شاب
مصابي موش بس ابطفل لو شاب...بخوتي والانصار اهل الحميه
وداع الحسين لأهل بيته
رساله للوطن لو تصح ودیت...يیمه ابکربلا اتحضرين ودیت
تشوفيني امن اشم حسين وديت...الأمانه ابرگبتي المنج وصيه
وفيه
رکن الصبر متضعضع وداوي مصابك زلزل العالم وداوي
لون بيدي لفت قلبي وداوي جرح قلبك قبل ورد المنيه
وفيه
دم قلبي جرى اعلى الوجن ونصاب...يحق لي لو احط النوح انصاب
شفت مثلي يخويه انفجع وانصاب...الجفيلي امجدمه مهر المنيه
الجواب
تركتي بالقلب وشكثر ونصار...يزينب مثل اخوج حسین ونصار
وحيد وما بقت له اهل ونصار...وقلبه امن العطش ناره سريه
شجاعة الحسين
وحید حسین لجله اعظاي بيدي...ونده بالقوم بالبتار بيدي
ما أعطي ابذل وضيم بيدي...واقر اولا أفر امن المنيه
الشهادة
آه يا الدهر من مره وصابه...حسين اللي رسول الله وصابه
يوسفه الحجر صك وجهه وصابه...ابقلبه حرمله ابسهم المنيه
وفيه
من ذايب دليلي الدمع منصاب...على اللي اله ابساق العرش منصاب
يوسفه القلب منه ابسهم منصاب...ومن خلفه شلع سهم المنيه
مجيء المهر إلى المخيم
وحق وادي الغري واللي يسكنه...قلبي يرف راح اللي يسكنه
المهر يصهل دقومي له يسكنه...يمكن رد اخويه حسين اليه
وفيه
الدهر شاهر علينا منجلنيه...بعدما من يعمه منجالینا
جانا المهر لكن من جالينا...خالي السرج والونه شجيه
وفيه
حال المهر مني الضلع حناه...شعر راسه ابدم حسین حناه
يحن يصهل ومشجي الكون حناه...الظليمه ايصيح من عظم الرزيه
هجوم الأعداء على المخيم
انا اشما أمنع ادموعي وكفها...شبيه المطر بخدودي وكفها
لجل الوقفت اعلى التل وكفها...على الهام ونخت راعي الحميه
وفيه
هادم يهل جفن العين هاماي...هامال العرش للسبط هاماي
على التل والزمت بالعشر هاماي...وندهت حسین قوم انغر علیه
ذبح الحسين
المحب ينحب ابريج الحزن شرگاه...وغرب الكون مظلم شبه شرگاه
الصدر حسین گلي الشمر شرگاه...ابنعله وزلزل ابفعله الوطيه
وفيه
عفيه العقل مني اشلون منجن...ابمصاب انفجع بيه من بشر منجن
خوات حسين يم حسین منجن...وشافن شمر حز نحر الشفيه
حرق مخيم الحسين
يترثة سعد خاب الأمل والراي...ولا تهنی ابلذید الزاد والراي
الاماره ابجتل اخويه اتريد والراي...وفجعت العالم ابذبح الشفيه
وفيه
اخيامي يا شمر بالنار شبيت...وانا اللي ابحجرة المختار شبیت
ابنيران الرجس يا خلق شبيت...علي والمصطفى وبنته الزجيه
وفيه
نحل جسمي وتذوب الروح بالهام عجب مني ثبت لي العقل بالهام
انا اتكفل يتامی حسین بالهام لون طفل التسحقه اخيول امیه
ليلة الحادية عشرة
دليلي امن الحزن والهضم منطر...قسمت الليل ويا الحرم منطر
قضيته ابضيم هذا الفجر منطر...مدري امن العدى اشيجري عليه
وفيه
ألف أح الذبح أهلي وحالي...دليلي أنتخي ابحيدر وحالي
يصح ما يدري ابأهلي وحالي...أريده امن الغري ایلحق عليه
وفيه
يبويه الخيل عالصيوان غارت...وبالحق عيينا امن الخوف غارت
يبويه اولا علينا الشيم غارت...وخوتي امصرعین اعلى الوطيه
وفيه
عزیزه وصرت لا آمر ولنها...وبناتك هاي عدوانك ولنها
تنوح وتندب الوالي ولنها...تعاين فارس ایحوط الثنيه
وفيه
سلوه ما ردت بالدهر يا من...بس قلبي من العدوان يا من
ترى احنا بس حرم واطفال يامن...قرب لينا تنحی ابیا نویه
وفيه
احنا اللي بنينا الحق ونبني...دهاني هالذي صابج ونبني
اخوج حسین یا زینب ونبني...ولفيت ابرى اليتامی ابهالعشيه
وفيه
علي ترضى يبويه أذل ونهان...بناتك ضایعه ما سمعت ونهان
عليهن صرت افتش دوم ونهان...ولن كل وحده هالتبجي ابنحيه
فعل الجمال
جنوب الكون ظل ينشد شماله...عرش الله صبح مایل شماله
احسین بکربلا قطع شماله...ويمينه ابخنجره نسل الدعيه
مرور النساء على القتلى
يخويه الدهر بالذله وضعنا...وحدى حادي الزمل عنك وضعنه
حما للضايعات انت وضعنا...وبيدي النايبات اقطعت بيه
وفيه
يحادي العيس ريض الضعن وانه...نشوف حسين حي لو سكن وانه
لا غسل وکفن لا دفن وانه...يصير امشي ويظل جسمه رميه
الرباب
دمعي ما نشف بالعين بس فار...وقلبي ما سكن بالروع بس فار
مانا امعوده يحسين بس فار...وهسا ابذل عدو وامشي هديه
تودع الرضيع
جم بیت القلب للحزن يبني...الدهر لرض المصايب حيف يبني
مثلي بالخلق ما نفجع يبني...الولد والوالد الراحوا امن ایدیه
