عريس جاسم...متهنى ابشبابه
جيبوا الولد لمه تشوف احواله...متهنى ابشبابه

عريس ومخضب ابفيض ادمومه...والله فجيعه
وبزفته ما حضرت اهله وقومه...وين الوديعه
صار العرس في ساعة ميشومه...وحاله فظيعه
عريس ساعه وساعه في شياله...متهنی ابشبابه

جابه الشهيد حسين وسط اخيامه...وحن وتحسر
شاله وتخط فوق التراب اقدامه...والدمع ينثر
ما بین اخوته مدده واعمامه...وقلبه تفطر
وذابت يويلي مهجته من شاله...متهنی ابشبابه

وابصف عمامه مدده واخوانه...والقلب صادي
عدهم بجى وقلبه تشب نيرانه...والدمع بادي
واتزفر او نادى على نسوانه...راحت اولادي
قومن إلى العريس شوفن حاله...متهنی ابشبابه

رمله اطلعي امن الخدر یا محزونه...ونصبي عزيه
لحقي على اوليدج وغمضي اعيونه...قبل المنيه
للقبر هالمعرس تری ایزفونه...امصيبه شجيه
ایذوب القلب كلما اشوف احواله...متهني ابشبابه

طلعت تنادي امن الخبا مرتاعه...والدمع يجري
عريس شفتوا ما تهنی ساعه...يفداه عمري
قومي يسكنه اتزودي امن اوداعه...للضيم صبري
وخفي البجا ابني منفطر دلاله...متهني ابشبابه

عريس بالله شفتوا صار اخضابه...من جاري الراس
حنة اجفوفه من ادموم اصوابه...امصيبه بهالناس
وانجمع عرسه ساعه ويا امصابه...شفتوا بالاعراس
ابعيد البلا ریت السلامه فاله...متهنی ابشبابه

امن النوح والله ما اتسلى وانسى...هاي الرزيه
عريس ساعه ما تهنی ابعرسه...قبل البليه
ثاري الولد عرس ابساعه نحسه...وجاته المنيه
والموت ليته جالي اولا جاله...متهني ابشبابه