اخضاب كل عريس حنا
دون الشبان اوليدي دون الشبان...تفصیل اچفان اثيابه تفصیل اچفان
ذاب أفادي...وقلبي صادي
لحواله دون الشبان
کل احوال ابني غريبه تفجع اقلوب الحبايب
الناس تتهنى ابفرحها بالعرس واحنا ابمصایب
تزف معرسها عمامه وابني عماته الغرایب
اتزفه النسوان...اوليدي اتزفه النسوان
ابنوح اواحزان...احبابه ابنوح اواحزان
دمه اخضابه...صعب امصابه
واحواله دون الشبان
اخضاب كل عريس حنا وخضبوا اوليدي ابدمه
ابدال لملبس نثار اسهام جات المهجة امه
ما بقت للحرم مهجه حين نادي الولد عمه
وسط الميدان...اوليدي وسط الميدان
بین الفرسان...حرابه بين الفرسان
حاطوا الصوبين...نادى بحسين
واحواله دون الشبان
احسین یا عمي ادركني من قبل ما اتروح روحي
شد هالطبره لبراسي بعد ضمد لي اجروحي
لجل ريحانة الهادي اولبني طول الدهر نوحي
شافه سهفان...اوليدي شافه سهفان
جابه الصيوان...لحبابه جابه الصيوان
و قلبه مجروح...دمعه مسفوح
لحواله دون الشبان
فوق صدره حسین شاله وتخط فوق القاع رجله
اشلون فجعه انفجع قلبي منكسر بالخلق مثله
من شفت مدد اوليدي بين اخوانه او اهله
فوق التربان...اوليدي فوق التربان
تسفح غدران...اصوابه تسفح غدران
ابصدر الوالي...وانا اشحالي
واحواله دون الشبان
اشلون يوليدي عفتني ابدار غربه ضيعتني
شوفك ابهالحال مرني او مرد دلالي وفتني
طول عمري بالبواجي العظم المصيبه اتركتني
بین العدوان...اوليدي بين العدوان
انذل وانهان...منصابه انذل وانهان
وين انا اروح...وابني مذبوح
واحواله دون الشبان
يا ثمر قلبي يروحي ماني ربيتك ابحجري
رضعتك دمي ابحليب الثدي كون اتصير ذخري
لكن اشبيدك وانا اشبيدي فجعني بيك دهري
ذبحوه عطشان...اوليدي ذبحوه عطشان
دم راسه چان...اخضابه دم راسه چان
حنا اچفوفه...يفجع شوفه
واحواله دون الشبان
قومي سعديني يزينب شوفي ابني في انزاعه
غرِّبت عينه اوشبح لي خل نمد للموت باعه
وين سكنه خل تجي العريسها وتکثر اوداعه
مرمي ابتربان...اوليدي مرمي ابتربان
بسيوف اوزان...اصوابه بسيوف اوزان
شدي اجروحه...غابت روحه
واحواله دون الشبان
لعمي امن النوح عينين من عقب عينك يذخري
لو شفت شبان قلبي ينفجع واعرف عمري
بس اريد ابچي المصابك يا حبيبي طول دهري
يا غصن بان...اوليدي يا غصن بان
قبل الميحان...امصابه قبل الميحان
شوفه يحسين...غمض للعين
واحواله دون الشبان
ارتعش جاسم من سمع لمه تندهه وفتح عينه
راد یتکلم یوسفه اولا قدر بس جر ونینه
روحه راحت وامه صاحت صوت مفجوعه حزينه
عمري لاچان...اوليدي عمري لاچان
فدوه وقربان...لحسابه فدوه وقربان
راح اوليدي...فات امن ايدي
واحواله دون الشبان
