اوليدي يا علي الاكبر ساکت ما تلبيني
بس ونك يفت احشاي باخر ساعه حاجيني

متقطع من اونينك يبعد اجلاي هرش اجلاي
حالك ذوب افادي يعقلي من تون بهداي
ماني امك يروح الروح ربيتك ابلب احشاي
بطل ساعه من لونين...او لمك لحظه دیر العین
واحد يبني موش اثنين...عندي جيف انا اتصبر
بعدك من يسليني...باخر ساعه حاجيني

ما أمل عقب هالیوم افرح يبني بعيادي
لقضي كل حياتي ابنوح وافني العمر بحدادي
کل ونه التونها احساب طعنه اتصير بفادي
قلبي صار كله اجروح...من ونك بروح الروح
بعدك قلي وين اروح...قلبي ذاب واتفطر
من ونك عمت عيني...باخر ساعه حاجيني

بطل ونتك يبني او لحظه اطرف لي اعيونك
عاين يا عديل الروح عماتك يندبونك
واني امك بذلت احشاي يبني ومهجتي دونك
ربيتك ابلب احشاي...يا من للنواظر ماي
وللتالي يبعد اجلاي...اسمع ونتك مقدر
ساکت يا نظر عيني...باخر ساعه حاجيني

يبني امصابي موش امصاب واحد جان أمره يهون
يبني وحدة المظلوم صرعی عزوته ايونون
وعماتك يبعد الروح عقبه او بعدك ايضيعون
يبني هاي تاليها...أمك ما تحاجيها
بعدك من يظل ليها...يحميني عن العسكر
للاوطان ایودیني...باخر ساعه حاجيني

ايقلها وينحب المظلوم ابنج ما تشوفينه
راسه منشطر نصين يحجي لا تكلفینه
جسمه امبضع ابلجروح جبت ابنج تودعينه
صاحت والضلع محني...يابن المصطفی اعذرني
ابجي ولو صحت يبني...اجذب ونه واتحسر
ابحسره ولا تخليني...باخر ساعه حاجيني

اتحسر وانفجر دمه او حاول يفتح العينين
فتح وانهمر دمعه او خفف من جذب لونين
صد لمه يودعها نظر نظره لبوه حسین
وصد الزینب ابحسره...ما يحجي فقط نظره
وابخده جرت عبره...نحبت والدمع ينثر
صاحت يا ضيا عيني...باخر ساعه حاجيني

ودعهم ابطرف العين ويلاه او غمض عينه
مالت رقبته وأمه ماسمعت إلى اونينه
مات ابني تنادي آه زینب ما تشوفينه
ونه النوب ما سمعه...وخرت فوقه امفرعه
خلوا ابني أباودعه...وبانادیه یا الاكبر
ساکت ببني تشجيني...باخر ساعه حاجيني