جاب الولد للخيم شاله ابصدره...مهجة الهادي
ومدد عزیزه ومهجته اعلى الغبره...مهجة الهادي

مدد عزیزه بالثرا وهل دمعه...والقلب ذايب
صعد انفاسه وحزنه حارق ضلعه...من هالمصایب
نادى النسا وطلعت الحوری تنعى...وذيچ الغرایب
ثکلی اوحفن يجذب الحسره...مهجة الهادي

زینب تجس نبضه وتهل دمعتها...وتجذب الونه
ما یحترك بس ونته فجعتها...وأيست منه
وعاينت سکنه وتنتحب سمعتها...ونشدتها عنه
عمه دقولي اشحال روح الزهرا...مهجة الهادي

صاحت يسكنه أيسي امن الغالي...قاضي نحيبه
روحي فجعها وانمرد دلالي...من هالمصيبه
الله يعظم بيه أجر الوالي...وامه الغريبه
ابدوله واصبح دولته منکسره...مهجة الهادي

وليلى تهل ادموعها وتنادي اوليدي بشوفه
بيدي لشد جرحه ابدمعي البادي...لغسل ازلوفه
وانجان مات ابني وعزیز افادي...عمري لعوفه
ويا حبيبي وسدوني ابحفره...مهجة الهادي

واهوت تقلب ويل قلبي اجروحه...واحنت ظهرها
وتمسح يویلي ادمومه المسفوحه...ولطمت صدرها
لمه شبح عينه وفاضت روحه...وفقدت صبرها
وصاحت ترك چبدي الولد منفطره...مهجة الهادي

خرت تنادي وتنتحب مرتاعه...والله مصيبه
مات الولد يحسين لو في انزاعه...من وين اجيبه
ما غمضت عينه وفتحتوا باعه...يابن النجيبه
صبري يقول الها ويسچب عبره...مهجة الهادي