متغبنه وقفت وعبرتها جريه...تخفي النشيج وتجذب الحسره شجيه

من عاينت حيدر وأبو فاضل بحجره...العباس يبجي والوصي يجذب الحسره
ايقلب اجفوفه ويلثم ازنوده وصدره...ودموع عينه بلت الشيبه البهيه

صاحت فجعت القلب يا ليث الحرايب...ساعة فرح هذي مهي ساعة مصایب
ليكون شايف سيدي ببني معایب...اتقلب إيده وتنتحب نحبه شجيه

قلها ودمع عينه على الخدين منثور...ما شفت عيب اولا نقص ببنج ولا قصور
لكن تصور لي مصابه ابيوم عاشور...االله يذاك اليوم يوم الغاضريه

يوم التصك اعلى الشرایع خيل ورجال...وعباس بيهم صاعقه نزلت ابزلزال
مثل الأسد من صولته يذهل الأبطال...وبصارمه حتم القضا وحتف المنيه

ويصب على العسكر عذاب اکسوف وخسوف...ويکردس الخيل اويدق اصفوف بصفوف
ومن العدی يا ما يطير روس وجفوف...وبصرخته ایزلزل عساکر بني أميه

يم البنین اوجني ابعيني اشوفه...ابنصرة عضيده حسين تتقطع اجفوفه
يم البنین ابکربلا بدرج اخسوفه...ابضربة عمود ابهامته وينخسف ضيه

شهقت وصاحت والدمع يجري من العين...آنا وطفلي والخلايق فدوة لحسين
يا ليت بالعالم مثل عباس ألفين...تنذبح دون ابن النبي وروح الزجيه

قلها إلج يوم المصایب یا حزينه...يوم اليجي الناعي بشر لرض المدينه
ایفزع أهلها وتطلعين اتناشدینه...الله يا يوم الفجایع والرزيه

ايقلج احتسبي اتذبحت صعبين لمراس...عثمان مع جعفر وعبدالله وعباس
يم النهر قطعوا اجفوفه وفضخوا الراس...وانذبح ظامي اولا شرب قطرة اميه

وانتي تقولين الخلف في راس الحسين...ويقلج حسین انذبح والهاشميين
حرقوا اخيامه وسلبوا كل النساوين...وزينب خذوها اميسره فوق المطيه