عباس يا ذخري يغالي...متگوم تنده لك اعيالي
للماي يحشاي...تنده لك اعيالي

هاي تاليها يخويه اتعوفني بين الأعادي
تدري بيه هالعساکر حايطه وضايج الوادي
اتوعی وافتح لي اعيونك چان تسمعني انادي
يعمود بيتي اللي تهدم يچفيل طفلي اللي تيتم
للماي بحشاي...تنده لك اعيالي

شال راسه امن الترايب حطه ابحجره الشفيه
يمسح الدم عن جبينه ينفض اتراب الوطيه
انتبه عباس ونده یا فارس امهلني اشويه
لحسين خویه ایجي وودعه عباس چنه يصيح اسمعه
للماي يحشاي...تنده لك اعيالي

اتحسر وصبت ادموعه من سمع مهجة الهادي
ايقله آنا حسين جيتك من صرت بسمي تنادي
مصرعك ضيج ابعيني الواسعه وفتت افادي
يا طود یا سور الهواشم یا حید یاعز الفواطم
للماي يحشاي...تنده لك اعيالي

شال راسه بو الفضل من حجر اخيه للوطيه
ورجعه حسين ويرده للثرا راعي الحميه
ثلاث مرات ويرجعه وخاطبه ابلهجه شجيه
عباس يشجيني ونينك متريد امسح دم جبينك
للماي يحشاي...تنده لك اعيالي

يقله يا مظلوم هذي مو من احقوق الأخوه
راسي اتحطه ابحجرك خويه في وين المروه
من يحط راسك ابحجره بعدي يا نور النبوه
وحسين صاح ابصوت عالي فتيت دلالي يغالي
للماي يحشاي...تنده لك اعيالي

اهنا انتحب ويقول خویه بیرقي يا هو اليشيله
وانكسر ظهري يذخري بعدك وقلت الحيله
واشتفى مني عدوي وحملي طايح من يجي له
عباس تفجعني اچفوفك لتقول آنا ما اشوفك
للماي يحشاي...تنده لك اعيالي

قال ماي الجود سایل شبه عيني ومثل دمي
وألم چفيني وراسي مو سبب غمي وهمي
عطش طفلك أشد واعظم سکنه لو نادت يعمي
ويزيد حزني من تنادي عباس تتنالك اولادي
للماي يحشاي...تنده لك عيالي

ساعه لن عباس مالت رگبته اوونه تگاصر
فارقت روحه وابو السجاد ظل یکسر الخاطر
يصيح بيه اوداعة الله صرت بعدك مالي ناصر
سجاه يا ويلي ابيمينه ويصيح يا حامي الضعينه
للماي يحشاي...تنده لك عيالي