مصاب أهل بيت النبي يشجي المحبين...تذکر مصايبهم الشيعه طول لسنين

شبه الفريضه المحب ما ينسی حبیبه...وتشجيه لو حلت ابمحبوبه مصيبه
يلطم الصدره وينتحب ويشق جيبه...ويذرف ادموعه الساخنه ابصفحة الخدين

واحد من احبابك يشيعي مات هاليوم...أعني الجواد اللي قضى ابغداد مسموم
واصبح جنازة امعطله من يوم إلى يوم...شابه الكاظم بالجسر وابکربلا حسین

وابيوم ثالث طلعت الشيعه ابمسيره...قالوا نشيّع بالعزا شیخ العشيره
باعلام سود امنشّره ونرفع سريره...ارجال التشيعه والنسا تنعي الصوبين

طلعت جماهير الخلق والكل ينادي...بعده شباب ومات یا فجعة افادي
الله ولا واحد رحم عترة الهادي...من بني أميه أو بني العباس المجرمين

جابوا النعش للقنطره والناس حوله...ونادي المنادي وأحزن الشیعه ابقوله
هذا سليل المصطفى وابن البتوله...مسموم مات بدار غربه والأمل وین

صارت إلى الشيعه صوايح برض بغداد...تنعى الجواد ابن البتوله ابحرقة افاد
حطّت عزاه سبعة أيام وتعلن احداد...للنبي اتعزّي والوصي وست النساوین

ويوم اوقفت زینب اتحشّم یا رجاجيل...مهجة رسول الله يظل من غير تغسيل
والتلبيه التجهيز اخوها داسته الخيل...تلطم الشيعه اصدورها من أجل الحسین

هذي الشعایر ورث للشيعه إلى اليوم...شوفي يزهرا شيعتچ تندب المسموم
تنعى اولادچ دوبها وذبحة المظلوم...في کربلا وانتي الشفيعه للمحبين