ظلّ ممدود...راعي الجود...موسی بن جعفر بالجِسِر
عالي الجاه...ما حَدّ جاه...حتّى يسَوّي لُه قَبِر

یا صاحب السَّجدَه الطويله لحد...تبقى على دجله بلَيّا اتِلحَد
ماچِنّك امنِ اولاد طه الأمجَد
عنّك وِين...حامي الدين...مَيجي يشوفك بالجسر

وِين اليُوصَل لِلوصي بِرساله...ايقِلّه يِجِي لِينَه وِيعَاين حاله
مَرمي على دِجله ولا حَدّ جالَه
ظلّ مطروح...منّه ايفوح...مِسِك يسبُق مَن يمرّ

يالكانِت املاك السَّما انصاره...موسی بن جعفر ما لَفتَك اخباره
مَرمي على دجله بلَيّه امواری
عجَب ثور...يالـمَنصور...بِـملاك رَبّ مقتدر

سلمان وصَلتَه ابمدایِن كِسری...غَسّلتَه أو واریت جِسمه ابحُفره
أو موسی بن جعفر يظَلّ ابجِسره
چیف اتنام...يا ضرغام...وابنك رمَيّه بالجسر

فجعه أو هَضيمه چان بِتخَلّونَه...مرمي على دجلَه ولا تشيلونه
معتاد كل ميّت هَلَه ایحضرونه
بعد الموت...عالتابوت...يِنشال جسمه للقبر

ما ظَلّت اجنازه بلَيّا اموارى...إلاَّ السبط واللّي ثَوَى بِجواره
أعني حبيب المصطفى وانصاره
ثَلثةِ ایّام...فوق ارغام...من غير كافور أو سِدِر