في فضل بغداد وتعظيم الكاظم عليه السلام
بغداد بيها الشرف والناموس...موسَی بن جعفر
بحرِ العِلِم فيها أوتاج الروس...موسَی بن جعفر
بغداد فيها الشرف والهيبه...أو فيها المكارم
نوز تشعشع في أرض طيبه...ابغُرّة الكاظم
بيها طلع وبغيرها امغيبه...عزّ الهواشم
حجّه على العالم من القُدّوس...موسَی بن جعفر
بغداد أرضها غدِت قدسيّه...أو بيها السعاده
بالفِيها جبدَه غدِت مفريّه...أو ذاق الشهاده
بيه العَدُو حصَّل الأمنيّه...ودرَك امراده
والأمر لله اشكُثُر قاسى البُوس...موسَی بن جعفر
كم جَرَّعه كاس المحَن هارون...رُكن الضلاله
قاسى البَليّه والمحن والهون...رُوحي فِدالَه
ليت اللّي الله كَوَّنه في الكون...فَدوه غَدا لَه
قَضّى العُمُر طول الدَّهر بِحبُوس...موسَی بن جعفر
قَضّى حياته ابسِجِن عدوانه...طُود الإمامه
جازی الرِّجِس لِيمَام بِحسانَه...اوادّى الكرامه
حَقّر جلاله أو قَدره أو شانه...أو صَغّر مقامه
وهُوّ الذي بيه الملا محروس...موسَی بن جعفر
قَدرَه يحقّرونه أو يصغّرونه...أو الله يعظّمه
من سجن للآخر ينقلونه...من غير جُرمه
جدّه الهادي ما ينكرونه...والشافعه أُمّه
واللّي يحبّه في الحشِر مانوس...موسَی بن جعفر
ياللّي تحبّونَه أو تِزورونه...بشروا بكرامه
كلّما تأملونه تنالونه...يوم القيامه
بالكان دايم وسطة اسجونه...خلصت ايّامه
منكم يحقّ اللطم فوق الروس...موسَی بن جعفر
