(من للمكارم بعدك يا ابا محمد)
يا شيال بحر الجود ریض والنعش رده
حتى اتسايله الوفاد وین اتروح من بعده
المن تگصد الوفاد عگب الچان مگصدها
اوياهو الينعم اعليها اوتعد اديارها ایردها
محلت كل مرابعها او غوَّر عذب موردها
عگب الحسن بحر الجود * ياهو اللي عليها ایجود * عز هاشم صبح مفگود
الله ایساعد اعضيده اوهاشم من عگب فگده
گوض بدر علياها اوهاشم فگدت العينه
اوتم احسين من بعده يصفج وسف بیمینه
يعاين جاسم ابعينه اوتهمل بالدمع عينه
يصیح اودمعته تجري * فگدانک کسر ظهري * اويلي اعليك ياضخري
من عگب الهظم والضيم يعضيدي رحت برده
صبرت على الهظم کله اوهذا الصبر تاليه
تظعن والچبد مسموم وفگادك يخل بيه
یا بدر السلف فرگاك هضمه يصعب اعليه
يعضيدي يبو محمد * هضمك ماسده اعلى احد *هاليوم العدو عید
زيَّن يا الحسن شامه اوهاشم صارت ابشده
فگدك يا حليف الجود هاشم يصعب اعليها
ذلت من عگب عيناك واظلمت نواديها
اصبح عيد هذا اليوم بالشام او نواحيها
لمن سمعتك مفگود *یا بحر الكرم والجود *هم بيك الزمان ایعود
یا ماي الحياة الراح من عدنان وتبده
عاین سلوتك جاسم اوشوفه الفگدك اشحاله
ظل ينحب على امصابك اوفگدك مرد دلاله
چه ترضه يظل جسام منه العين هماله
يبگه من زغر سنه *يتيم اويجذب الونه * خاب امن العرس ظنه
عگبك ظل يدير العين اودمعه ایهل على خده
شالو نعش ابو محمد لعد جده يزورونه
اوهاشم دایرین اعلیه اوغيض اوهظم مشحونه
لن (أم الجمل) تصرخ البيتى لا تدخلونه
ردوا النعش یا عدنان * اوجادم عالحزم مروان * برَّه ایصیح گبر (افلان)
هيهات الحسن يحسين گبره ايصير عد جده
صاح احسين يا مروان اجینه ابنعش ماجدنه
نجدد بالگبر عهده اونسدر بیه مگصدنه
شنهو السبب تمنعنه يظالم من گبر جدنه
ادیون الكم تطلبونه *بغضكم لا تضهرونه *خل هاشم يزورونه
تطوف ابنعش سيدها وتجدد بالگبر عهده
(صاحت) هالامر ميصير وومت بيدها السفيان
گام اعلى النعش يعصف من عدها النبل والزان
سل السيف ابوفاضل اوگام ايصيح يا عدنان
يالبلحرب گول او فعل لا يعصف على اعضيدي النبل * وآنه بلوجود اوعدل
لحد يخوتى لحد نعش الحسن يرمونه
يخوتي اوبلوجود انتم حيين او تشوفونه
ما واحد يسل سيفه وبو امحمد یگف دونه
لحد يفرسان الحرب * يا ضخر چشاف الكرب * بینه اشتفت صخر اوحرب
لمن شاف ابوفاضل تعناله عضيده احسين
الوصيه لاتضيعوها ينادي يخوتي الطيبين
هذا اليوم مو يومك يبو فاضل ينور العين
يومك يخويه ابکربله * توگع اچفوفك بالفله * وجثتك تظل امفصله
او تجري اعليك عبراتي او حيلي افراگك ایهده
