في حق الامام الحسن عليه السلام
من بني العليه الغوالب نعش یا ماجد ضعن
اصبح احسين اعله فگده اینوح والكون انرجن
یا علی ایضمك ضريحك واصبح اليوم الحسين
ظهره معطوف العضيده او تهل من عنده العين
ایصیح یا بدر الغوالب يبو امحمد شلت وین
یا عضيدي انفصم ظهري...من عگب عينك يضخري
انهدم رکني اوطود صبري
اونامت اعيون الخصيم او حاربت عيني الوسن
والمصيبه حین زینب لفت يمه اتودعه
او عاينت للطشت شافت بي چبدته امگطعه
لطمت اوصاحت ابونه الصخر منها اتصدعه
يبو امحمد جاوب اختك...من مرد بالسم مهجتك...اوبالطشت گطع چبدتك
ما تحاچيني يخویه اهروش گلبي اتگطعن
یا هو عگبك لليتامه اوبيها مثلك من يروف
او یاهو بعدك على الأرامل يحن چلزوج العطوف
المن الوفاد عگبك بعد تگصد والضيوف
اویاهو عگبك للوازم...يابدر عز الهواشم...يتمت بالزغر جاسم
اوچان ضني اتشوف عرسه او خاب هليوم المضن
وانگطع منك رجاها وخاب هلیوم المضن
من سمعها احسین اجاها اوقامت ادموعه تهل
صاح لا تبچین يختي اوللخدر ردها النفل
غسل اعضيده ابيمينه اوعگب ماتم الغسل
صاح يشبول الهواشم...ودعو بحر المچارم...اگبل ابن الحسن جاسم
يتمتني ايصيح بويه اوطاح ودموعه جرن
من گضه اوداع الهواشم صاح ابو اليمه النفل
يالله شيلو النعش زوروه گبر سید الرسل
اگبلو بالنعش لاچن لگوا بت ذاك العجل
علبغل طلعت مغضبه...اوعلى القبح والشر محربه...اتصيح ابنكم ذاك دربه
ردو عن بیتي يهاشم لا اشب نار الفتن
صاح ابو اليمه اعلهونچ ليش علشر مجهده
نعش اخوي ابقبر جده انرید عهده انجدده
نادته هيهات وومت بيدها الصوب العده
گام نبل الگوم يعصف...وعله نعش الحسن يخطف...اوبينهم مروان يحلف
ما يطب الحسن وفلان گضه اوبره اندفن
والنعش بين الهواشم والسهام علیه ترش
والحسین ایشوف ذاك النبل يعصف علنعش
جرد العباس سيفه اوصاح لاچن يرتعش
يلعلي والله يغالب...يا ضخر يوم النوايب...بيكم اشهود الحرايب
والسيوف ابين ادينه اوينضرب نعش الحسن
والحسين ايصيح هون لا يبحر الفضل هود
هذ مو يومك يخويه ابرهد ياضنوت العود
الك يوم البي تصول عالنهر حامل الجود
والسهم يوگع ابعينك...عگب يسراك وايمينك...والعمود ايصك جبينك
وانه ضامي انچتل عگبك والحرم يتيسرن
