شیخ العشيره جمّع اخوانه ولنصار...واولاد عمه بالسويه اصغار واكبار

ليلة العاشر بالمحرم عمدة الدين...جمّع انصاره وعزوته نور المسلمين
وقوم الاعادي بالخيم حاطت الصوبين...وقام وخطب فيهم شبل حيدر الكرار

ونادى عليهم يا اصحابي تسمعوني...هالقوم ماليهم طمع في احد دوني
روحوا بظلام الليل عني واتركوني...وحدي اجاهد هالعدا واحمي هالاستار

وصد للبطل عباس اخوه ابقلب مجروح...وقله يخويه هالعشيه بخوتك روح
امكم ضعيفه ومن بعدكم لازمه النوح...وتنظر منازلكم عليها يسفي اغبار

شال العلم عباس بيده وصاح في الحال...والله كلامك يا عضيدي يدهش البال
كل هالذي ما تريده طلبة امحال...قلبي کسرته ابهالحجي يا نسل لطهار

نمشي يخويه وين وانته اتظل مفرود...ويّا حرم واطفال حاير بين لجنود
ما هي امروه أنظل عقب عينك بلوجود...هذي یبوالسجاد ما هي شيمة احرار

وحق جدك المختار يا مولى الموالي...لبذل ينور العين لجلك كل غالي
ولو تقطع اكفوفي وتتوزع أوصالي...كله ولا انأدي ابحقك عشر معشار

واما حبیب الليث جيدوم السريه...اتناول الرايه وشالها اقبال الشفيه
ونادى ابعالي الصوت حي على المنيه...يحسين جيتك للشهاده وعفت لديار

وزينب تدير العين فيهم والدمع سال...اتنادي يربي انته العليم ابكل لحوال
جيت ابحموله من الوطن من حولي ابطال...يارب تكفيهم صروف الدهر لو جار