سجادك يداحي الباب گوم او عاين الحاله
من عگب اليسر سموه والسم مرد دلاله

ظل من عگب ابوه احسين ونه ایجر بثر ونه
ابعينه الماي لو شافه يهل دمعه او يصد عنه
یگول اشلون اضوگ الماي وحسين انحرم منه
ما رحموه عدوانه * واهل بيته اورضعانه * كلها انفنت عطشانه
ظلوا جثث بالحومه اوداستهم الخياله

کلما يذكر المظلوم تسچب دمعة اعيونه
ليل انهار ما يهجع اومن حزنه انخطف لونه
گامت تعتني الشيعه اوعلى حزنه يلومونه
یگلوله ارحم احوالك * حزنك مرد دلالك * یا هو اليظل لعيالك
وانته السلف تاليه او بدر الدين وهلاله

ابحسره ظعن عن دنياه امن امته جدك الهادي
اوجدك حيدر الكرار راح ابسيف المرادي
وامك گضت مظلومه اومن اضلوعها اتنادي
اوعمك غيث وفاده * ألسم مرد افاده * الچتل الكم صبح عاده
وبها الشرف باري الكون خص المصطفه او آله

لمن سمع ناداهم اونار الحزن وگاده
ایگلهم مثل متگولون صار النه الچتل عاده
لاچن یا هو من عدكم گبل سامع امن اجداده
منه اتسلبت نسوان * اوطافوا بيهن البلدان * اومن عدها احترگ صیوان
اوشافن راس واليهن عدوَّه اعلى الرمح شاله

عيني ما تصد ليهن واشوفن زینب اگبالي
الا اذكر هظيمتها واذکر لوعة اطفالي
يها الوادم تلوموني امن اتلف بالحزن حالي
شفت الشام بعيوني * والسلسله اعلى امتوني * واهاليها يشتموني
اورحنه المجلس الطاغي اوخواتي وگفن اگباله

يتمایل طرب شفته ومن الفرح يتثنه
ويعاين لعد زینب اوزينب تجذب الونه
يمه راس ابوي احسين وبناته يشوفنه
ابعود ايجلب اشفافه اوباري الكون ما خافه * يهتف فرح بسلافه
والباري نكر وحيه اوبالميعاد ما باله

يحیدر تم على هالحال يتكاثر علیه همه
حسره ایجر بثر حسره ویون اعلى ابو اليمه
حتى احرب عدوَّه اعليه يا حامي الحمه اوسمه
خلا يلوج او چبدته ممروده * اوحصل عدوه ابچتلته مگصوده
يتم الباقر یا علي من عوده * خلاه تجري دمعته اعلى اخدوده

گام اوغسله الباقر اوشاف الأثر بمتونه
حن گلبه اوصفگ بیده اوسالت دمعة اعيونه
يگله یا ذنب عامل اوحالك ما يرحمونه
لسا يبويه امخزنات اجروحك * فوگ النوايب والهظيمه اونوحك
الله يساعد عالمصایب روحك

شاله اونزَّله ابگبره اودمع العين يتجاره
اوتمت تنحب الفرگاه عياله او تصرخ ابداره
ما مست مسیته اعليه الا ابگبره اتواره
وحسين ظل ابكربلا اثلث تیام * تلعب عليه اخيول ذیچ الظلام
ما حصل واحد من جميع الاسلام
يحفر له گبر بيده او يسكن روعة أطفاله