في توليه يزيد وطلب البیعة من اهل الحجاز
يزيد اصبح ملك والحكم ناله...طلب ثارات ما فات او مضاله
اجت كتبه البلد يثرب سريعه...الواليها الوليد الكل تطيعه
او يخص اعلى أربعه ياخذ البيعه...امراده احسين من بيت الرساله
الوليد ارسل رسول الگاهم احضور...اهم بالمسجد او لا درو محذور
گال احسين مات الجان مغرور...او يزيد اخبركم اتأمر بداله
گالو عيب نصحبله او نشایع...يزيد او لا نطيع او لا نبایع
گال احسين حگي الچان ضایع...أطالب به وستوفي بداله
گالوله نخاف اعليك من هاي...يگلهم کون اصل عندي اخوتي وياي
ابالي او کون سيفي تحت يمناي...دعاه الموت وانطاه الوكاله
اجه او حشم اشبول التحت رايه...اسيوف الحفته بيها المنايه
مشه الدار الوليد اعتنه اعنايه...أبو السجاد ما حاذر او باله
اجو للحرب كلهم مستعدين...اسود او حفو احسين او مغضبين
هواشم بالعدد أسره جليلين...الليث ایغيض چفه عن ذباله
گال الباب موقفكم يخوتي...او كل واحد يگله اليوم موتي
يگلهم لو سمعتو حيل صوتي...اهجمو اعلى الوليد او على ارجاله
طب اعلى الوليد او لگه الديوان...او يشوف امساطر ابن الحكم مروان
گال اکتاب هذا و أمر سلطان...البيعه والوساده تنثناله
گال احسين باجر تجمع الناس...عموم اهل المدينه الذنب والراس
ذیچ الساع ابایع کون لا باس...نبایع طوع لمرك ومتثاله
يگله انصرف ورسل ليهم اخطار...حچه مروان و بداله من الاشوار
لا فاتك الثعلب بس الغبار...تشوفه او غير ضرب السيف ماله
نهض والسيف بيده او زعل زايد...اتهبه يبن الحكم نمتثل رايد
رجف ویگول اخليهن گلايد...اديك اربگبتك والزعل شاله
سمع عباس صوت احسين عالي...هجم والسيف بيده الما يبالي
نده يشبول ابو طالب تعالي...اجت ون الذي كلهم امثاله
صاح احسين يا عباس خلها...السيوف البلمغامد موعد الها
ابوادي كربله بالطف محلها...نجردها او نراويهم أهواله
خمد مروان شاف اشبولها اتهز...صوارمها او تريد ارگاب وتحز
چتفو بالعميد او دوحة العز...حيهم عن يمينه او عن شماله
تشوف الهاي يدخرون الاخوه...تگع للموت من تسمع النخوه
المثل عباس بيه العزم يگوه...شبل ينمال عنه او عن نزاله
تجمع جيش اميه او رادو احضور...حين احسين عيه راعي الشور
عزم لبلاد مکه شاف مخطور...او تنوه ايهاجر او يرچب اعياله
طب المسجد او صله اونوه الرحيل...يودع للنبي ويهاجر ابلیل
لزم بيده الگبر والمدمع ايسيل...او نده من خاطره او جده بچاله
انه ريحانتك ومي بتولك...ابهذه الصار بيه ما حچولك
يجدي اتفرقت عگبك اشمولك...يجدي ونهدم بيتك اظلاله
يزيد الخّرب الهذي الشريعه...يجدي اشلون ابايعله وطيعه
يجدي ضاقت اعلينه الوسيعه...الرده وياي والمايل ابداله
نام احسين عگب البچه ابعبره...او ظهر ليه النبي من وسط گبره
سريع اتناوشه او ظمه اعلى صدره...او بچه جده او بچه حسين او حچاله
يگله بالشهاده اتنول دارك...انته او خاصه جملة انصارك
او شارك بالعمل من بچه او زارك...او نجات الشيعتك بيها الدلاله
يجدي ليك اخذني اوياك خلني...هوان الدنيه او ذلها كتلني
او مرامي انبالها يا جد رمني...امراده الشامت ابهلیوم ناله
جدم للبله يحسين صبرك...او عاشر بالمحرم فيض نحرك
ابوادي كربله المصرع او گبرك...او جسمك غير دمه غسل لاله
آمر بالرحيل ابليل يسرون...طلع ما طلع موسه ابحكم فرعون
نزل مکه او بگه بيها والعيون...ترامج من يزيد او ترباله
اهل کوفه درت بحسين عيه...يبايع يو يسالم عيب اميه
اجته الكتب كل دفعه سویه...اجدم وحكم ابحكم العداله
اجت تتره يساني اكتاب لكتاب...احنه انصارك او يحسين ترتاب
عليك الأمر وجبل بين الاطياب...علينه فارض الباري امتثاله
انجان امجیم ترسل واحد اینوب...عنك عنده معتمد یگضي المطلوب
نريد من اهل بيتك شخص محسوب...عنده ابسنة الباري دلاله
وجه مسلم البيه الهيابه...او کتب هذا المفوض بالنيابه
اهو مني جریب اگرب گرابه...امفضل والفضل بالعلم ناله
اکتاب احسن مسلم حامله الهم...او عليه اتكورو من طب نزلهم
قره اكتاب السبط وحضور كلهم...اهل کوفان كل واحد إچاله
كامت بايعت مسلم اعينها...أوشيخ او کهل حتى ازغار سنها
ذكر لحسين مسلم خبر عنها...هذا الصار بالعنده بداله
بگه احسين ابنزوله الموسم الحاج...او يزيد ارسل خفايه او بالفتن هاج
شاف احسين هذي مالها اعلاج...ظهر مغبون والحج ما تناله
توجه للمدينه اوللوطن عاد...وهل کوفه كتبها رايح او راد
عزم لعراقها ايسير ابو السجاد...او تولم والظعن شدو ارحاله
اجه الكوفي الباب الدار ووچب...يره ملك الحجاز اشلون يركب
لگه احسين اوهواشمها المدرب...عمید او چالبدر ليلة كماله
شاف امن المحامل عجب هيه...وآمر بالركوب الهاشميه
لگه هودج ابزیه اشلون زيه...جليل امن العرب حازت امثاله
وده جاسم العمته ابهمه...قال اتوکلي او گومي يعمه
تگله لاج گلبي اوثگل همه...ونتم كل فرد يحرس اعياله
رد جاسم العمه انطاه العلوم...التفت لبنه علي يبني علي گوم
ليها روح ونته صير ملزوم...گلها او خل تجي بنت الرساله
مشه ليها علي ابعزمه تجي وياه...ایتوزمها وبوه احسين وداه
قالت يا علي البيد او بلایاه...اريد امن اخوتي ومشي بخياله
علي رد اوعرف شنهو التريده...اسد يدمي الجبيل ابرفعت ايده
اجه من عمته المطلب يعيده...لبوه او عاد مطلبها او حچاله
التفت للبيه مراجل من علي اتلوح...بوجها او دون اخوه ایفدَّي الروح
یا عباس لختك زينب اتروح...گلها اتگوم ونطيها الكفاله
اجه مطلوبها اليعرف الغايه...اجه مهيوبها البيه الكفايه
يگلها ابذمتي او ظلچ الرايه...اورمحي اوصارمي عدها اقفاله
تگله ابذمتك يگوه عزمها...اختك دوم نخوتك بسمها
وصية والدك حيدر الزمها...ضامن بيك وعليك اتكاله
اخوچ امكلف أهديب التكاليف...اخوچ احمي الظعينه ابشفرة السيف
العلم دار الضيافه ونتي الضيف...اشيله او محملج يمشي ابخياله
ذيج الساع زینب گامت اویاه...بخوها تعلگت وأمنت بحماه
اجت تمشي وراه اوگصر ممشاه...جلاله الزینب او الها الجلاله
الكوفي واجف او رجب الحرم صار...او لن طلعت بطل يرهب امن الدار
السيف ابرگبته او يطرد سنه النار...هواشم عني اتنحو ابعجاله
وره عباس طلعن حرم منهن...فواطم حافه بيهن خدمهن
ثنه ركبته اومن ركب الهن...بذاك الهودج أوعدل اظلاله
ظهر شاب المبرگع من نسلهم...تنحو يا بني هاشم يگلهم
السيف ابرگبته اومنهو شلهم...علي اوجده علي اوحيهم اشباله
طلعت من وراه ليله او خدمها...او تلگاها علي الحاوي شيمها
ثنه ركبته او بیده لزمها...ركبها او ستر محملها رحاله
طلع شاب ايتمايل وسمر اللون...هذا ابن الحسن جاسم يگولون
الجعد مرخیه اومد لي اعلى المتون...يحير الواصف ابحسنه اوجماله
اشبول اشبول من ذیچ المسامي...يگلهم عني اتنحو يا عمامي
مثل السهم ينظم للمرامي...امدلل والحيه حليه الدلاله
ابخدم طلعت ام جاسم من وطنها...ثنه ركبته اورکبها ابنها
المحنية الظهر من كبر سنها...أوحيَّد هذا هو ما مش بداله
طلع شاب اعلى متنه طفل شايل...تنحو يخوتي عن الرحايل
اثر عنده امن العباده دلايل...السجود او نور البوجهه ايتلاله
وراه طلعت العين احسين ليها...رباب ايحب الدار التحل بيها
ثنه ركبته او داست عليها...اورکبها اوليها الطفل شاله
رچبو لن عليله اتهذي ابرنه...دریضو الظعن يا ماشين عنه
اجفولي خل اود عمكم يهلنه...ابشجه اوكل السمعها الدمع ساله
بچت كل عين من شافت بچاها...اوبچه احسين اعلى حالتها اوتناها
تگله ابجدك المختار طاها...انه ريد الظعن حطت رحاله
آمر بالنزول او تلگنها...خوات احسين رادن يهودنها
عن هاي المصايب يسلنها...افراگ احسين يو وحشة اعياله
يگللها الحرم للدار ردي...تگول اشلون اهودن بعد وحدي
عبدالله الطفل خلوه عندي...رضيع اوخاف تتغير أحواله
خذت منهم طفلهم وفردت بيه...او عية فاطمه للحرم تنطيه
اخوها امرادها سلوه تخليه...خذن منها الطفل بت الرساله
صاحت آه یا بویه اتنوني...يويه احسين وياكم اخذوني
وحيده او هم عليله تخلوني...فگدکم یا هلي العلتي اچماله
يگلها انچانه حلينه البلاد...نشوف اعراقها او يطون المراد
اخوي ايچيچ متعني السجاد...تجين اوياه بالعز والجلاله
تهم ليهم او عنهم ما نعوها...تنادي يا هلي من فارقوها
اجت للمحمل فگدت نور ابوها...طش المجلس ابغيبت اهلاله
ابهذا العز حاملهن انشدن...ابهذا العز ضعاینهن او مدن
ومن ردن انشدني اشلون ردن...ردن لا دلال او لاچفاله
