آخر الوداع:
تعنها من الخيم للعلگمي احسين...يصيح بصوت يعضيدي اوگعت وين
بعد ما شوف دربي يا ضوه العين...يخويه الكون كله ابعيني اظلم
يخويه ابیا کتر طاحن ازنودک...يخويه العلم وينه او وين جودک
يبوفاضل زماني هم يعودک...او شملي اللي تشتت بیک یلتم
تخوصر يم عضيده او صاح اويلي...يشمس انهاري اویا بدر ليلي
يبوفاضل يخویه اگطعت حيلي...او طود الصبر من بعدک تهدم
يخويه ظهري الفگدک تحنّه...أو عدوي اتشمت أبحالي او تحنه
هوه چالرمح فوگه او گام عنه...صفيحه اوحدها لفراگه تثلم
حنه ظهره علیه او راد شيله...او بي يسدر لعد خيمة العيله
يگله لا يبن حامي دخيله...خليني ابمچاني يلمشيم
يگله شسبب يانور عيناي...ما تهوه الخيمنه اتروح وياي
يگله واعدت سکنه على الماي...شگللها امن اروحن للمخيم
يخويه اشلون اصل و اسمع اسکینه...تگلي الوعد ياعباس وینه
يخويه الموت ما بيني او بينه...اودعنک و اسلم للمحتم
حنه ظهره اعلى اخيه مثل الهلال...يودعه و الدمع بالعين همال
گام احسين لاچن گام بیحال...نحيل او بيه ما غير النفس تم
أيس من اخو و انگطع ظنه...او سدَّر للخيم يجذب الونه
لفن زینب او سکنه ایسايلنه...وين الجابنه او بینه اتوزم
يخويه ليش وحدك جاي لينه...چا عباس اخوک الفحل وینه
سمع زینب أحسین اوجرت عينه...او بالعباس الها الاجر عظم
يگلها او على اخدوده الدمع يجري...راح البلشداید چان ضخري
زینب عگب اخوي انكسر ظهري...او سور المنع يا زينب تهدم
يزينب راح ابو فاضل عضيدي...اوطاحت رایتي او مرهفي امن ایدي
بگیت ابين عدواني اوحیدي...او علیه بن سعد للجيش حشم
