طبّ البطل عباس يستأذن من احسین...واحنه يقبّل هامته أورجليه وليدين

هلّت ادموعه أوصاح يا عزّ الهواشم...ضرّ العطش يبن الرسول ابهالفواطم
أورایاتنا يحسين عدّنا والصوارم...ونصبر على الذل والهضم يا قرة العين

ما يستوي نصبر على الذلّ والهضيمه...أوبالهضم والذلّ ابد ما تقبل الشيمه
واجب على راعي الحمی يحمي حريمه...والهضم والذل يصعب اعلى الهاشميين

أردك ترخصني يعلّة سرّ لِوجود...بركب احصاني أوبحمل البتار والجود
القربه ابملّیها يعلّة كل موجود...لو توقع اكفوفي أويروح الراس نِصِّين

هاج العزم يحسین بيَّه أوضاق صدري...ارخصني ببيع إلى الحريم يحسین عمري
قلّه حبيب المصطفی يحزام ظهري...ما بيني أو بينك أخاف ايفرّق البين

نادى البطل عباس يا شبل الأمينه...زينب لفتني بالرضيع ايدير عينه
يابس السانه امن الظّما مصفرّ لونه...أوسكنه شفتها تشتكي امن العطش يحسين

مازال ويّا احسین عباس الغضنفر...يستأذنه أولـمّن اذن له قام مسترّ
متنومس أومبتسم سنّه شبل حيدر...أوصاح ابشروا بالماي كلكم يا نساوين

أوآمر يقدّمواله جواده وافي الباس...وتدرَّع ابدرعه أووضع مغفر على الراس
واتقلّد ابسيفه أوشال الجود عباس...واتخيّل احصانه حبيب الهاشميين