عنكم سمعت أخبار یا زینب فظيعه...لكن بعضها شيّبتني يا وديعه

صاحت انشدني يا محمد عن هالخبار...نادى يزينب يا عزيزة حامي الجار
معلوم اخويه عقب اخوته ظل محتار...لكن صدق ذبحوا على صدره رضيعه

صاحت أودمع العين فوق الخد سكّاب...يمحمد اسكت لا تسايل عن الأحباب
مابقّوا النا شيخ يمحمد ولا شاب...كلهم قضوا بالسيف يا حلو الطبيعه

صاح اخبريني يا وديعه ابفعل عباس...شنهو اللي سوّى في الحريبه وافي الباس
اسمع يقولوا في الحرب زلزل الأرجاس...قالت لا تسأل عن فعل حامي الوديعه

فعل البطل عباس يوم الحرب موصوف...طب المعارك يالأخو والراس مکشوف
بيهم صرخ صرخه أو خلاّ الكون مرجوف...لكن وسافه طاح وكفوفه قيطعه

صاح اسمع ايقولون زَوّجتوا الجاسم...أو ساعة ازفافه امجدَّله كل الهواشم
یا هو اللي زفّ الشاب قالت له الفواطم...ويّا اخوك احسین قال اشهالفجيعه

صاح اخبريني صدق خيّي في انزاعه...ما حدّ غمض عينه ولا حدّ مدّ باعه
صاحت يخويه رحت أنا ابغي اوداعه...واشوف حاله لنّه ابحالٍ شنيعه

شفت الشمر جاثي على صدره بلنعال...ايهبّر أوداجه صحت خاف الله ابهالفعال
بالسوط لوّعني أو طحت خویه بلرمال...حنّ أو جرى بالدم على خده ادموعه

حنّ أو جذب ونه أو دمع عينه ايسيل...أو نادی يزینب صدق داست صدره الخيل
نادت اضلوعه فصّلتها الخيل تفصيل...اتحسَّر أو نادی و شهالمصيبه الفظيعه

لكن خبر جاني وظنّ یا زینب ابعید...صاحت يسَوّيها الدهر يا خوي ويزيد
صاح اسمع ايقولون دخلوا بك على ايزيد...قالت نعم دخلوا بي ابحاله شنيعه

دخلوا ابنا المجلس بلا ساتر ولا قناع...بالحبل مچتوفين نتستر بلذراع
أولا لفانا یا محمد أحد فزّاع...منكم ولا عاداتكم انتوا القطيعه

ذَبّ العمامه أو صاح یا زینب كسيره...يوم دخلتي مجلس الطاغي أسيره
ياليت جسمي چان واروه ابحفيره...أولا اسمع ابهاي المصيبه يا وديعه