لَكبَر من الميدان ردّا ايصيح يحسین...اسقني اميّه يا شبل ساقي المحبّين

والله يبويه امن العطش ذايب افّادي...نشفت ارياقي والقلب يحسین صادي
حرّ أوعطش وجهاد يا مهجة الهادي...ومكابد الفرسان في الميدان يحسين

لو نار قلبي تنطفي ابقطرة اميّه...ماحَدّ ثبت من هالعدى في الغاضريّه
أولو يجتمع هذا الجمع كلّه عليَّه...أوحقّك لخلّي اجموعهم يسرى على ايمين

وحسین قام استقبله أوضمّه لصدره...واحنى عليه أهَلّ على خدّه العبره
وبقي يشمّه أويلثمه أونوب يصَبّره...ويقول اله يبني اجيب الماي من وين

يبني تصبَّر والصبر من شان لَبرار...يسقيك من حوض النبي جدّك الكرار
أولـمّن تعذَّر له أبوه اعلى الحرب ثار...أونادى إلى الميدان اريد الإذن يحسین

نادى السبط يبني توخَّرلي فرد ساع...خلِّ النِّسا أولطفال تقضي منّك اوداع
يبني عقب ساعه اباشوفك على القاع...لوصال يبني اموزَّعه والراس نصّين

نادی علی زینب دقومي یا مصونه...لـمّي الودايع للشباب ايودّعونه
وتزوّدوا منّه قبل ما تفقدونه...والاّ النِّسا اولطفال دارن بيه صوبين

أولُو كان يا شيعي تعاين حالة امّه...نوب تشمّه أوتلثمه أونوبٍ تضمّه
تمسح عرق وجهه أوشعر راسه تنظمه...وتصيح بيه أوداعة الله يا ضيا العين