طلعت بت ابو اليمّه امن الخيام...سكنه اتصيح يحسين جاسمنه وگع وين
يسكينه يگلها طاح جسّام...مابين الميادين بسيوف الشياطين

يبونه يبن حيدر داحي الباب...يالبالكون ينهاب
دلّينه يبو اليمّه اعله هالشاب...گلبي ابحرگته ذاب
لـمّن شافت اعليه زور نشّاب...ابجسمه شجرة احراب
صار انهارها اعله اعيونها اظلام...ابيسراها واليمين
يويلي ادمت الخدّين

وگفت فوگ راسه اوگامت اتصيح...اودمع اعيونها اتسيح
تنخه ابغالب اوكلها مجاريح...يا ويلي اومذابيح
اشموس اتنور وابدور اومصابيح...على الغبره مطاريح
نومه يالعلي ولياني يكرام...عفتوني اوعلى البين
وانويتوا مظعنين

نوبه اتحشّمه اوتعتب عليه نوب...اومن يسمع المعتوب
ضحايه اعله الوطيّه اسباع ابغير...ارواح واگلوب
ابدور ايّامهم خلّتهم اشعوب...اوركنتهم للغيوب
اوما ظنّيت لن تغدرها الايّام...حيث الها میامین
اوزين اتبدّل ابشين

يبن عمّي يجاسم خاب رجواي...من وصلك يمنواي
هواك العذب حي اوحبّك اهواي...اوحياتي ابدار دنياي
لاچن فگدك اجره اليوم عيناي...دم اعليك لا ماي
اسهرها الفراگ او أعيَت اتنام...لاچن نامت العين
لعداك الملاعين

فگدك مايبن عمّي يالهلال...چان ايخطر عالبال
طفل فرض الجهاد اعليك ما حال...اعليك ابياسبب حال
لاچن الغوالب منها الاطفال...الكل صارم اوعسّال
اوما بوجودهم گصران تنظام...اوتنعتها الدواوين
اعداهم والمحبّين

امهنّه ابعرسك البالكون ماصوف...اوبين الناس معروف
مثلك ما يصير اوصار مزفوف...تزفّه انواع الحتوف
اویه اميّه حرب عرسك جيمت اصفوف...اوشمعك زان وسيوف
وأملبس زفافك نبل واسهام...اوخضّبلك الچفّين
بالدم صارم البين