[ حورب العباس ]
حورب العباس اعلى سبعين الف...بالجود والراية اورهيف الحتف
مابالدهر والكون رايه مثل...رایة العباس الحريب النفل
النصر بيها إهلال لاچن يهل...نضح المنايه او للنفوس ايهتف
عسّالها إبدوحة الموت افترع...ومن ثدي الحتوف المظلمه رضع
لاچن اسهيل اسنانها لو طلع...اوسم الدمه امن الهام گام ايهدف
واعتله ابغارب جيد من الرمك...لوكر صعد راسه الگطب الفلك
حافره لودك الرواسي تدك...فوگ الأرض واعتره الكون الرجف
يتثبشب او گوشه يفيّي اظهره...او مجره الهوه ابميدان الأسود جره
راسه الثريّتها اوباسفل ثره...يرفس الحافر زفّ الأجدل يزف
لحسين ابو فاضل گصد مستعد...سلّم اوبين ايديه وگف چالعبد
ناداه بعضيدي شلك من گصد...امر يمن للموت مالك ولف
يحسين ماتم بعد عندي صبر...لحّد يبو اليمّه اوضاگ الصدر
ارد أطلب إبثار إخوتي من الكفر...ما تحن بالرخصه عَليَ وتعطف
ناداه يعضيدي وضوه ناظري...حچيك يبو فاضل كسر خاطري
لو غبت يتشتت شمل عسكري...ويبني من بعدك ابحالي الضعف
وانجان بعضيدي او يابو الفضل...عالموت عازم والك نيّه إتحمل
دونك الماي الگلب طفله او طفل...اومن تصل جاريه إبسرعه اغترف
ابشر يبو اليمه او مرادي الورد...ومالي ابهل كرّه سواه من گصد
ودعّه اولاچن عنده ودّع چبد...عرض ابچفه الواه جنحه يرف
لـمّن العبّاس الحرب شافته...حيّه إبملگاها وهي حيّته
امّه عرفها والحرب عرفته...عبّاس ابنها أورضع منها الخلف
سجّر على ارواح العده الملهبه...او ظهظب على الجيمان طير الوبه
صكها عضيد احسين بمذهّبه...اونكّس حمرها او للكتايب چشف
گالت جماهير النذال الكفر...ماننجه من عبّاس حتّه نفر
گفّل بیارغها اوتولّه النهر...حتّه رِسَه اعله الماي مثل الچهف
