بعد ليل سهرها...وصبرها...قدرها...ناعي الاحباب
على حسين بجاها...بوفاها...وجزاها...يوم الحساب
تگول الغانمه .. شفاعة فاطمه

بيتها الخالي من احبابه صفه...بي گمر عالي و على غفلة طفه
جم جرح ينزف و لا صحله شفه...وافت و عدها يقين و معرفه
تدري ام الحسن بنت المصطفه...من كرمها بالوفه تجازي الوفه
حلم طول عمرها...و نذرها...و ثمرها...الاربع نجوم
على الباب احلها...وصلها...و املها...تدوع الهموم
تريد الخاتمه .. شفاعة فاطمه

قدوة هاي ام البنين الكل مره...اتبيع دنيتها ابنجاة الاخره
حلمت و يوم الوعد تتنطره...تخدم ابيت المجد و المفخره
امر هذا امن الجليل امقدره...كربله غاية حلمها اتفسره
يوافون ولدها...ابوعدها...و عهدها...و العهد دين
يسرون گلبها...ابعتبها...و طلبها...خدمة حسين
تصيح المكرمه .. شفاعة فاطمه

خبر عن جيت الضعن من سمعته...تركض ابلايه شعور اتلگته
كل املها حسين رادت شوفته...لمن اعله اولادها ما نشدته
اتحير و گامت تناشد دمعته...تموت لو يشرح مصيبة ذبحته
دمه ايسيل دمعها...و صدعها...و فجعها...براعي الاحساس
حنه البين ظهرها...و كسرها...ابگمرها...العالي عباس
ابصبرها امحزمه .. شفاعة فاطمه

وين زينب گلي يا ناعي الضعن...ايساعد الله ام المصايب و المحن
من طفولتها و قسه اوياها الزمن...اشلون عگب حسين ردت للوطن
و المصيبة اثنينهن من التگن...بجن الدنيه ابنعيهن من بجن
يجمرة حنيني...اخبريني...بنيني...بيهم اقصور
ضحايه انذرتهم...ردتهم...لأختهم...مأمن و سور
و اجر سيل الدمه .. شفاعة فاطمه

تگلها يا زينب جنت عندي امل...حسين اشوفه و خل يوافيني الاجل
وي رحيله عمري حسيته ارتحل...ودعت روحي امن هد ذاك المحل
عافني ابين الرجه و بين الوجل...و گلبي عن غيره و لا يوم السأل
واصيح اشبگالي...يغالي...سؤالي...بلجن اتعود
يروحي الزجيه...شبيديه...و عليّه...جروحك اشهود
ابفضل رب السمه .. شفاعة فاطمه

اني تالي العمر جانت منيتي...حسين يحضرني و يشيل اجنازتي
و ينزل الگبري و ينور وحشتي...و التراب ايهله ساعة دفنتي
اني بدياري و احس ابغربتي...حسين بيتي و موطني و كل دنيتي
الگلب راد قراره...ابجواره...ابمزاره...مرقدي يكون
اشم طيب عطوره...و ادوره...و ازوره...اويه اليزورون
نبع بعد الضمه .. شفاعة فاطمه

للعراق انشد الناوين ابسفر...لمّن يزورون مگطوع النحر
خلي يگلوله وصل ليك الخبر...اشرف اعله ام البنين امر القدر
انجان يوم رايد يوم تشييع ايحضر...خل يجيب اوياه عباس الگمر
على حسين حنيني...ونيني...و يجيني...و يفگد الحال
انه يهون مصابي...و عتابي...و عذابي...و همي ينزال
رحيلي اتشيمه .. شفاعة فاطمه