غايب..عن السمع صوت الخِدر زهرائي
غايب..جرحي حُسيني وعُمري عاشورائي
كل عفة الله ابراسي..المهدي ظَهر بأنفاسي
جرحي حُسيني وعُمري عاشورائي
ما ماتت أمي فاطمه عاشت ابين اعيوني
منها ورثت آنا الخدر ما كو خدر من دوني
نظراتي ترتيلة وحي عرش الله بين اجفوني
آنا اللي ربيت الخدر وأم الخدر سموني
غيبة..كسر الضلع تبدي وتعيش الحاضر
غيبة..تخلص حسب توقيت يوم العاشر
هناك يصير إحساسي..المهدي ظَهر بأنفاسي
جرحي حُسيني وعُمري عاشورائي
ابموتتها أمي شيبت آخذ عمر من عدها
روحه علي روح النبي والدي هم والدها
صوت الكسر ما ينسمع لا صوت كسرة خدها
أصوات تبقه امحجبه رب العرش رايدها
حيره..حته بدفنها القمر هاجر ليله
غيره..ليل اهدعش ذاك الوكت أحجيله
ابهودجنه صوت أجراسي..المهدي ظَهر بأنفاسي
جرحي حُسيني وعُمري عاشورائي
نفس الزكية بكربله يعني الحسين الضامي
السفياني يوصل كعبتي والكعبة عند اخيامي
تكمل علامات اليسر وبكربلاء أيامي
لو وصلوا اخيمنه أندعي عجل ظهور أيتامي
الخيمه..توقع مثل وقعت الباب بروحي
الخيمه..اهتزت وتتساقط جمر بجروحي
ينذبح صفوة ناسي..المهدي ظَهر بأنفاسي
جرحي حُسيني وعُمري عاشورائي
اثلثمية واثلاثه وعشر للمهدي أدري أنصاره
اثمانين طفله لو طفل بيهم أظل محتاره
تربية أبو الحمله علي والكرم عندي أخباره
متني يدق بابه ويجي سوط الشمر خطاره
زينب..آنا أستر الليل بعباتي وثوبي
زينب..ابلا إذن من يقدر يقرب صوبي
بس لو رحل عباسي..المهدي ظَهر بأنفاسي
جرحي حُسيني وعُمري عاشورائي
التل منصة خطبتي راح أصعد آنا اعليها
سبعين ألف تسكت إذا زينب يمر طاريها
تطلع شمس من الغرب هاي العلامة اشبيها
تطلع رقية من الخيم تسحق جمر رجليها
صيحه..بهاي العلامه أعلم وترويلي
صيحه..صيحة سكينه من الضرب لحقيني
عمنه الوعد ما ناسي..المهدي ظَهر بأنفاسي
جرحي حُسيني وعُمري عاشورائي
ما ميزوني بكل شكل اشقد حاولوا اهوايه
كل الحرم نفس الوجه وبإسمي متسمايه
راح أصرخ بإذن الدهر يصحه الزمن بحجايه
واللهِ لا تمحو الذكر اتبجي زلمهم هايه
حيره..معقوله هم انتي مره ايسألوني
حيره..ذليتهم ما قدروا يذلوني
غيرة علي ابنوماسي..المهدي ظَهر بأنفاسي
جرحي حُسيني وعُمري عاشورائي
مملكة عفه اعله الهزل إحساس الأميرة بفكري
نحر الحسين اعله الرمح يتعب أبدله بنحري
من أختنق أشتم علي مثل النسيم بصدري
حقها تفاخر بالحشر فاطمه بهيبة صبري
واجب..عندي قضية وهالقضية ببالي
واجب..ستر النسه غالي ويعيش الغالي
احجاب الضوه مقياسي..المهدي ظَهر بأنفاسي
جرحي حُسيني وعُمري عاشورائي
القرآن نقطه بكلمتي باب الله أصبح بابي
بجدامي يتحول ذهب لمن أسحقه اترابي
فبعد أن قد مُلئت ظلماً بقتل أحبابي
راح أملي هالعالم خدر و السمه اتصير احجابي
عالي..هام الخدر ما دام أرفع هامي
عالي..وبعلم عباس ارفعتها أعلامي
بعد الزمان القاسي..المهدي ظَهر بأنفاسي
جرحي حُسيني وعُمري عاشورائي
