يا علي بكل مره دفعوا فاطمه...يلزم ضلوعه محمد بالسمه
يا علي الدافنهه بيدك جانت لزينب وطن
خيمه طاحت يتمتكم من محمد للحسن
اليوم ماتت رحمة الله وباجر سياط وضعن
ومحسن محسبته للطف بس كبل وكته اندفن
من وكع بالجنه نصبوو ماتمه...يلزم ضلوعه محمد بالسمه
وحشه بالجنه وبواجي وادم اليشعل شمع
وساعة الكسروا ضلعهه صياح محسن ينسمع
الزهره الله القاسملهه كبال عينك تنكطع
يايا علي ويوم القيامه شويه من الضلع
بركبة البسمار كل هذا الدمه...يلزم ضلوعه محمد بالسمه
الليل وجهه اصفر لكيته وخافت ادور الارض
والشمس لمت ضواهه وعدهه واهس تنقرض
استغربت جبريل ساكت ما محاول يعترض
ولا امام اليوكفلهه ولا محمد ينتفض
ماتت ويوم القيامه المحكمه...يلزم ضلوعه محمد بالسمه
كبور عافتكم وراهه وزينب مبجيتهه دم
من جرح فركة محمد توه كلب الزهره لم
وابو فاضل كله غيره بضهرك وشاللهه هم
ورده كطعوا حته محسن ما شبع من عدهه شم
وانته تعرف ما تردلك سالمه...يلزم ضلوعه محمد بالسمه
بيومهه المر على كلبك جان موقف مو سهل
يا علي ومن طاح محسن جنت ميت لو عدل
شصاير بكلبك يحيدر مختلف روح وشكل
انته لازمتك وصيه ما صحت يابو الفضل
يا علي الدفعوهه وادم مجرمه...يلزم ضلوعه محمد بالسمه
راحت وصورتهه ضلت يا علي وحقك تحن
لا وراهه اللليل يمشي ولا جفن واصل جفن
ماخذه الحيل بجفاهه وعايفه بوجهك حزن
حقك وشيبرده كلبه اليسمع بزينب تون
كبالك ضلوع الشمس نزفت دمه...يلزم ضلوعه محمد بالسمه
يا علي ومن نزلتهه احجيلي وصيته الكبر
كلي دليته بجرحهه واشرتله على الكسر
تدري يلجمهه ضلعهه وخاف يرجع ينعصر
ماتت وعافت وراهه وجوه ذبلانه وصفر
غمضت يا حيدر وكلشي انعمه...يلزم ضلوعه محمد بالسمه
