نستمع خلونه تسبيح الشجن...يروي سلمان الجره لاُم الحسن
فاطمه يا فاطمه

يروي سلمان الخبر واللي جره...ولسُليم ايرد سؤاله ويخبره
دخلوا ابلا أذن بيت الطاهره...ولو دخل والدهه هم چان إئتذن

واعله باب الطاهره الظالم حضر...صاح حِرگوا الدار ماكو خط حَمَر
وبيده ضلع الزهرة متعمد كسر...دم ضلعهه ويه مدمعهه جرن

بلا خمار الزهرة بالباب احتمت...دفعوا الباب الضلوع اتهشمت
بت محمد يا سُليم اتشتمت...انصبت اعليها النوايب والمحن

يا سُليم الزهرة بالمنزل تون...اي وإن ناده المنافق اي وإن
اُمر عبده بسوط طگهه اعله المتن...فاطمة ايضربوهه هايه ابيا سنن

يروي سلمان لسُليم الفاجعه...حقداً الطاغوت للباب ادفعه
دفع چن باب السماء السابعه...طاح چنه الكون وانجومه هِون

يروي سلمان المصيبة المؤلمه...لِحگي يا فضة تنادي فاطمه
طاح محسن والضلع ينزف دمه...طاح والحيل انهدم منهه ووهن

ثلث شهود الزهرة عدهه اعله المصاب...الحايط البسمار وي عتبة الباب
لرض ضلعهه ويله من يوم الحساب...سقر يسلك يحلم بجنة عدن

يا سُليم الجره شي من الخيال...حيدر الـبيده قلع باب الضلال
ايده چتفوهه ويجرونه بحبال...بالحبل گادوا علي اهل الفتن

يا علي اتوصّي الزچية ابهالامر...گبري كون ابليل اظلم ينحفر
عن عيون الناس اخفيه الگبر...ادفني بالسر يا علي مو بالعلن