وصية النبي صلى الله عليه وآله وسلم بالعتره
مابین سم وچتل گطعوها...ليش ظلموها
چم وچم اخبر الأمه المصطفى سيد البريه
كل نبي ایوصي بعترته لو دنت منه المنيه
وعترتي عدكم ودیعه لاتمسوها أبأذيه
لو دنت مني امنیتي...هلتن هله ابعترتي
من عقب عيني ابأمتي...لاتضيعون الوصيه
من تظلموها الظلم ياذیني...من عگب عيني
ومنه الوصیه هاي سمعوها...ليش ظلموها
ما اجل منها على الله عترتي ابكل الوسيعه
الكم ابها الدنيه رحمه وبالحشر هيه الشفيعه
یمتی من عگب عيني عترتي عدم ودیعه
الكم ابدنیاکم ضخر...وتنفعكم ابيوم الحشر
طيعوني يمتی ابها الامر...ويخسر امري الما يطيعه
يحرم عليکم چتل اهل بيتي...وظلم ذريتي
هاي الوصيه لا تضيعوها...ليش ظلموها
انه ياالامه بعثني الكم المعبود رحمه
وبهل بیتي وببن عمي تمت اعليكم النعمه
ابسمه الدین انجوم چنها وثبت بيها الدين اسمه
لولاهم العالم هلك...ولادار بالكون الفلك
كل وكت يخدمها الملك...ويفخر ابهذي الخدمه
تخدم املاك السبع بحماها...وبيها تتباها
الكم امان وفخر خلوها...ليش ظلموها
تدري يا رحمة الباري امتك من غبت عنها
نصبوا اعلى اهلك سقيفه وهاجت اعليهم فتنها
غصبوا الزهره فدکها ونحلتك غصبوها منها
ولدارها النوب اعتنوا...النار الضغاین سجروا
للمحسن ابحدها اسگطوا...وبچو حسين وحسنها
ظلت عقب عيناك يلمختار...تون ليل انهار
ومن البواچي اعليك منعوها...ليش ظلموها
هذا اول ظلم منها الجره اعلى الزهره الزچيه
وسرت هاي النار لمن سجرت بالغاضريه
ذبحو حسينك يطاها وهل بيته اهل الحميه
ومن بعده یا سید الرسل...ركبت بناتك على الهزل
مسلوبه مچتوفه ابحبل...ومشت للكوفه سبيه
وصيتك لعد امتك يهاديها...هاي تاليها
ابناتك على الهزل پرچبوها...ليش ظلموها
و گام هذا الظلم يسري يبو الزهره اعلى الأيمه
الذي بالسم توفه والذي سابح ابدمه
حتى للهادي عدوه ابمثل هذا اليوم سمه
ظل ينتحب شبل الحسن...ودموعه لمصابه جرن
عقب الغسل لفه ابچفن...اواره یالمختار جسمه
ما ظل ثلاثه اعلى الترب عاري...وچفّنه الذاري
وحسین جثته الكفر عافوها...ليش ظلموها
صاحت اعلی حسین زینب والدمع چالسيل جاري
مابكم یا گوم مسلم لعد هالجثه يواري
ولايصح واحد يچفنه لا يظل بالشمس عاري
ما واحد الزینب نغر...واراه والگبره حفر
ظل بالشمس دامي النحر...تسفي اعليه الذواري
ویلا يهظم حسین وعياله...وذلت اطفاله
بسياطهم لمن تولوها...ليش ظلموها
يوم الوعد يبن الحسن يا يوم...للثار يمته اتگوم
على الهظم عينك ما كفاها النوم...للثار يمته اتگوم
ناعي الحزن ما تسمع اينادي...من جدك الهادي
گوض ومن عنده الچبد مسموم...للثار يمته اتگوم
