[ یا فارس بدر وحينينها ]
عجب يافارس بدر وحنينها...تصد عن اوديعتك وجنينها
ماتره الدنيه اودهرها والزمان...مثلك امجرّب ابحومات الطعان
ماسوه چفّك المرهف والسنان...مثلك ابدم الرگاب ایزينها
ما برزلك ليث تشهدله السمر...الاّ واهده اعليك من نفسه العمر
ماتزم منشور الاّ والحشر...هاج واعداك اظرمت سجّينها
موسه الفرعونها الباري اهتفه...بالعصه والنور البيدّه كفه
اومثله المعبود ودّه المصطفه...ابمعجزین اتوجّه الوثنينها
معجزه القرآن بآياته العجب...وهيه امان اوخطر وحياة اوعطب
اومعجز الثاني علي ليث العرب...حبس طيب النوم عن جفنينها
اوضربت ابن ود رجحت یا فحل...على اعمال العالم ابخير العمل
اومن تراك احتوفها الفلك الزعل...الاذت ابجنبك على تأمينها
اولا شمس طلعت اولا فلك يدور...بالدهر وهله على مثلك غيور
چيف وانته عدل ياصاحب الصور...والصهاكي للوديعه ايهينها
اومن تهم ابأمر ما دونك يحول...سدّة اسكندر بالمعرج الخيول
لاچن اشبيدك على اوصية الرسول...استرت يسراك آه ايمينها
والاّ لاون مالدين الله مراد...ابصبرك اعله الظيم ياسيف الجهاد
مايزين الناس گادك بالنجاد...اخس خلگ الله اوجلفها اوشينها
لاچن اتحملّت یاداحي الباب...اوهوّن امصابك على الزهره الصواب
تبعتك ودموعها صب السحاب...اوتِوِن والعالم يِون لونينها
بالمصيبه اتعثر واتطيح اوتگوم...اوحايطه اعليها جماهير الهموم
خلّوا ابن عمّي تناديهم یگوم...او بالسياط اتسوّدت متنينها
آه لـمّن عبد الاسود ليها صد...رد عليها ابزعل آه اشلون رد
رفع چفّه اولطم من عدها الخد...حتّه يالغايب نثر قرطينها
اوعيّت اللي شكر مسعاها الحمد...عن ابو السبطين واليها ترد
يظن خافت رادها ذاك العبد...والزنيم الفاسد اوجبتينها
تمتنع بالضرب والكز والدفع...لا وبوها اوجودها ما تمتنع
سور للكرّار صارتله اومنع...مثل منعه دون جد سبطينها
خاضت ام الحسن دون المرتضه...للمنايه ابحور وضرام الغضه
لون ما يسود ابدعواها الفضه...دون شبهه يتّموا شبلينها
لاچن اتداركت حاميها ابلفظ...لو تتمّه فنت مافوگ الارض
مستضعفيها اورب خامس فرض...كوّن العالم لجل تكوينها
والله لاون ترفع اطراف الاقناع...هوت سبعتها على سبعة الگاع
لاچن ادّاركت المصيبه ابساع...اوهوّن اعليها اوصعد تهوينها
نادته وصوابها حدر الگصير...ياحمايه اوعود شبّرها اوشبير
شرّك ايعمني اوتجاسمني الخير...اوشاركيتك يا علي بثنينها
بچت وعليها الوصي دمعه سچب...حزن لاچن الزمان الها عتب
لفه الداره اوعن ثلاثتها انحجب...الموت ودها اوماگضت عشرينها
اوظلت ام الحسن ثكله والحسين...راسها امعصّب اوسلواها الونين
فگد ابوها اوغصب امير المؤمنين...اوسگط محسنها اوحمرة عينها
والهتكها والضلعها المنكسر...والغصب حگها اوبسمار الصدر
ما عليها يوم مصباحه يمر...الاّ بالنوح النهار ايعينها
مامضه يوم اوعليها اصبح جديد...الاّ وتجود ابمناحتها اوتزيد
حتّه من المصطفه جاها البريد...حيّت اوخفّت جدمها البينها
او گبل ما تگضي التفتت للفحل...نادته ابعبره اودمع محمر همل
يبن عمّي حان من عندي الاجل...ابنفسي اوصیّه اوأريد اتبينها
لو گضيت آنه يبو حسين اوحسن...غسلي تتولاّه اوتدرجني ابچفن
اولا تخلّي اجنازتي اصحاب الوثن...يحضروها اوحول بيني اوبينها
