ويل لمت المصطفه امن افعالها...برت چف ايمينها بشمالها

والنبي حي لاچن ابوادي المرض...شبّت الفتنه ايادي اهل الغرض
چم وعظها اومانفع بيها الوعظ...اوچم عذلها ورفضت عذّالها

ويّه ما ودّع يبو صالح الجد...خانت الگوم الودايع والعهد
آه يالعيشك ابهالدنيه نكد...وعبرتك دم عالوجن همّالها

ويّه ما واره النبي داحي الباب...وفض عشراه الوصي من التراب
هاجت اعليه العده اگطع السحاب...اودهره والدنيه وجميع انذالها

سيّدي ارخصني ارد اسولفلك اشصار...اعله الوصي من ودّع الهادي اوسار
من تصل طيبه يبو صالح الدار...سل عليها الناس وتعنّالها

واگف بالعتبه يموعد بالنصر...وانشد اومنها ابماصار اختبر
وهيه تحجيلك على امصاب الكسر...او على ايّام ام الحسن وليالها

ما تهود ابليل ما تهجع نهار...الفگد ابوها والهظم حامي الجار
والغصب ميراثها اوهجمة الدار...اوسگط محسنها اوهوان ادلالها

واشد ماشافت يبو صالح هظم...اوجور من فرعون والدها اوظلم
حمرة البعيونها اوكسر العظم...من ضلعها والامض اذلالها

آه لـمّن للوصي شرهت العين...اونادته لاچن ابحسرات اوونين
صاحب الكرّه الذي ابغزوة احنين...منهو غيرك للكتايب جالها

ما سمع سامع شبيهك بالطراد...من زمان آدم لعد يوم المعاد
چیف ياحيدر تگودك بالنجاد...بهم يا جزّارها اوچتّالها

وانّه ابّينك او منطوره ابحماك...اوروحك البعضاك وسويد الحشاك
الزنيم ايوسّم اخدودي ابرضاك...اوبالمدينه انته الفحل لرجالها

واستغيثن بيك يمصيّت يليث...اوفوگ وجناتي الدمع يشبه الغيث
مايبو السبطين تسمعني استغيث...والمودّه اگطعت چن احبالها

اوهاي مكسوره یسيف الله منك...والعذر للغيث ماينعد الك
ينغصب مني بوجودك فدك...وبيمينك للنفوس آجالها

صاح يم الحسن هودي اوأمنّي...واسكني ابوجدچ اوچنّي اوهونّي
ماني عن ميراثچ اوديني وني...اوما تروعّني الدنيه اهوالها

اولون ما يّم الميامين الشبول...امر ابوچ المصطفه الهادي الرسول
بالميادين الفوارس والخيول...تطب وانه ام الفخر خيالها

لاچن ارماني ابوصاياه ابسجن...گید ازنودي غده اعليّه يون
اوما عليّه اتجسّر الجلف الوثن...ادرك الردّه امن انوح اونالها

اومن احورب گالوا اعبيد الأوثان...حسد ومن اسكت يگولولي جبان
العفه اعله اعقولها وعله الزمان...نست سيفي الحصد روس ابطالها

ويلهم چم اهدرت منهم ادموم...اودمّرتهم وارغمت منهم اخشوم
اونغّصتها العيش وبساعة النوم...بيّه اتحسّب اواتر والها

والله لومادین ابوچ اومنزله...واسمه البيه الدهر يدوي اوهله
لرد هالعالم الفاسد لولّه...والعدم اشخاصه لخفي اخيالها

بين ما حيدر ابهدّي اعله البتول...لن الوذان ايهتف بسم الرسول
هذا ناداها المنعني ابحين اصول...اسم ابوچ البالوجود احيالها

اوظلت اتنازع ابعلتها لمن...گضت والكون المصيبتها انرجن
اوگام غسلّها الوصي اولفها ابچفن...وبسواد الليل زمها أوشالها

اومن گضه حيدر امن الزهره دفن...لذع چبده امصابها ابجمر الحزن
هاج وجده افراگها وامسه پوِن...ونّة الذبحوا طفلها اگبالها