غيبتك يبن الغزوها الدارها...اسم الاعظم يشبه الاسرارها
 
 ما على وجه الارض نعرف شخص...عرف علّتها ابنبض جس اوفحص
 اولاطلعلك عالم اعليها ينص...ابوكت معلوم اويزيل استارها
 
 اشلون غيبه اشلون طلعه اشلون سر...اشلون شفره اوطلّسم ما ينحزر
 حيّر الألباب وأصحاب الفكر...غدت بالعشوه اتخبط افكارها
 
 ليش هالسر دون الاسرار انكتم ...اولا گدر عالم ابشفراته ایعلم
 للإله ابغير شك جري الحكم ...والحكم ابحر بعيده اغوارها
 
 ماگدر واحد يحدّد غيبتك...اولا وكت من الزمان ابطلعتك
 مثل ابو يحيى اصبحت كل شيعتك...غيبتك چن شجرته اومنشارها
 
 غيبتك وشچم وچم شامت نذل ...عذِّبتنه اوطوّگتنه ابطوگ ذل
 الذي ينكر(امناره البالچفل ) ...غيبتك ما يعترف بخبارها
 
 حارت اهل المعرفه ابسرها المغيب...ما ظفرنه ابعالم انّشده اويجيب
 المرض ما يعرف دوا غير الطبيب...وهو اليدري ابعلّته اومگدارها
 
 مرض مخفي الأمد یگصر لو يطول...محد ايعرفه اوچذب كلمن یگول
 بس رسول الله وبن عم الرسول...للعلايم بيّنوا أدوارها
 
 اومدّة الغيبه اوعلم يوم الظهور...اعلوم غيبيّه اوخفايه امن الامور
 سر مصون امطلسم ابمخزن النور...طلعته الطيبه الشهيّه اثمارها
 
 بالظهورك للّذي ايواليك عيد...اوللنواصب والكفر سيفك يبيد
 حيث ما تنفع التوبه اولا تفيد...طلعتك غفله الرهيبه انذارها
 
 وين ذاك اليوم بي نحظه ابنصر...اوتحف بيك اصحابك ابحمد اوشكر
 مثل متحفّ الكواكب بالبدر...او تجلي دیجور الظلم بنوارها
 
 والاخبار ابطلعته حين التصل...للمدينه اوللحزن ينصب حفل
 تذكر امصاب النبي سيد الرسل...اوتذكر افعال الصحابه اشرارها
 
 اوتذكر الصار اوجره امن اعظم امصاب...اعله امّك الزهره الزچيّه امن الاصحاب
 من تصل للدار لا تنشد الباب...لاچن اخذ الخبر من بسمارها
 
 ضلع واحد هشّم اضلوع الحسين...اوذبح عبد الله ابسبب سگط الجنين
 وبحَرِگ باب امّك ابيوم الثنين...بالطفوف الخيم شبّت نارها