آيزهره .. باب بيتي ابهالرزية
آيزهره .. احد اسباب المنيه
آيزهره .. تعاشرن عيني و اديه
*****
انه حيدر و اعتذر منج يبيتي
بابي ما غيرته من يوم الأجيتي
ما خطر مرة اعله بالي يا مُنيتي
من وراهم بالدمع تغرق لحيتي
جان اخلي .. باب اخف من العمامه
جان اخلي .. مو جذع ريش النعامه
جان اخلي .. باب ما يعرف أذيه
*****
دمعي ينزل مو لأن دخلوا عليّه
لا وحق محسن يبت سيد البريه
اقدر امحيهم جمع بثنين اديه
بس بخت بيهم انه اموصه بوصيه
يجري دمعي .. لأن ما تلقيني يمج
يجري دمعي .. من اشوف ابابي دمج
يجري دمعي .. ريته كون الصار اليه
*****
انتي دنيه امن الوفه و شلون اودعج
مو ضلع يفطر سمه صدقيني وضعج
موتي اتمنه و لا تبجين اسمعج
ارضه انطي ضلوعي كلها و يصحه ضلعج
ابقي يمي .. انه روحي تعيش عندج
ابقي يمي .. ياهو يمسح راسي بعدج
ابقي يمي .. ديرة مال ايتام بيّه
*****
انتي امي و الأبو كل اهلي انتي
انتي ما زلتي وبقيتي انتي جنتي
انتي حاضر انتي ماضي يا ضحكتي
انتي عافيتي و علاجي و انتي صحتي
خلافج ابقه .. للحزن انه العلامه
خلافج ابقه .. حالي من حال اليتامه
خلافج ابقه .. و البجي يبجي عليّه
*****
بصدري لو ضاق النفس جنتيلي نسمه
يا نظر لعيوني بعدج عيني تعمه
هسه رايد اسألج سمعيني كلمه
ابدفنتج لمّن ارد يا هو الأكلمه
لو مشيتي .. يبقه بيج الساني يصدح
لو مشيتي .. ثاني يعقوب اني اصبح
لو مشيتي .. ثوب يوسف ماله جيّه
*****
كلشي يصرخ يا علي لا لا تهدها
حالك يبجي الحجر حيدر بعدها
عانك الله ابيا قلب تحفر لحدها
مو ترب يمكن دمع تدفن جسدها
كلشي يدري .. انتي بالنسبة اليّه
كلشي يدري .. مو هوه بل انتي ريّه
كلش يدري .. حته نجمات الثرية
*****
جنها صارت للأسف فرقنه موتج
و اذني ما تسمع بعد يالزهره صوتج
ردي لو كلمة لأن يذبح سكوتج
راح اودعج يالأخذ كل بابي قوتج
وداعة الله .. راح اوصي تراب قبرج
وداعة الله .. خاف يلجم صدفة كسرج
وداعة الله .. سامحيني يالزجيه
