كلماتج البيهن ضوه...ما يطفن بليل السبي
دمعج نزل بس مو دمع...مثل الوحي وگاصد نبي

يا شذرة من كرسي العرش...بس غيّر اوصافج دمه
طحتي ارض فوق الارض...بس وقعتج من يا سمه
شفت بخيالج جف علي...و شفت بدموعج فاطمه
نوحي انتي و الطوفان اجه...تتلاطم امواج الدمه
اهنا اثر حنه و شمع...و اهناكه خنصر منگطع
و اهنا فرس كاسر ضلع...و اهناكه ضحكت ناصبي

من حرّك رموشج هوه...راس الكفيل اهتز غضب
قلبج مثل باب النبي...و الحادي حمّالة حطب
يالحافيه فوق الرمل...واجب يفرشولج ذهب
كل نظرة منج عاصفة...جيش العده يرجف قُصَب
ألف و تسعمية قلم...كتبن على اطلال الخيم
زينب على الناگة علم...عاش الوقار الزينبي

بعده الطريق بأوله...درب السفر اسمه الشمر
ممكن شمر يذبح نبي...بس ايخسه يذبح خدر
طيحي لجن طيحة عشب...بس ينحني ما ينكسر
ليش انكسر جنح الوحي...بيدج محمد يحتضر
غيم السبي شايل عطش...أخرس مثل ليل اهدعش
لو گالوا الراس انخدش...قولي البقاء المعصبي

شفتج تدورين القمر...بين النجوم وما يصح
هذا الضوه مو بالسمه...يمج يزينب عالرمح
خد يشرق بليلج ضوه...و الثاني يشرق بالصبح
وثنينهن يطفن سوه...لو ينزف بمتنج جرح
والله لون يحجي الحبل...شاعر يصير ويرتجل
كلما وگع يمج طفل...ناده كفيلج عاتبي

أنفاسج امضيعه هوه...و اعيونج امضيعه خوي
والناگه تعثر مو تعب....بس بونينج تنجوي
تشرب دموعج بالسفر...لا تعطش ولا ترتوي
يا وسفه يطويج الحزن...مثل الصحف من تنطوي
عمرج كبر يم النهر...خمسين عام وكم شهر
رمح الحزن بيج استقر...مو سهلة من تتسلبي

نظراتج الروس اخوتج...نظرة سجين اعله الشمس
طبع الفراشة تحب ورد...مو عالمحامل تنحبس
واحساسج الينزل نده...و الحادي صخرة وما يحس
جم باجر يريد الدرب...و انتي اعله قلبج جم امس
صفناتج ينقطّن حجي...بيهن عتب بيهن بجي
ظهرج تعب خل يرتجي...بس لا يشوفج أجنبي

نعسانه بس كلج حذر...مثل القِطه ساهر يظل
صايود والفرصة رمش...من ينزل يطيح الجبل
منتبها بعيونج ملح...و الشامت يدور خلل
احمر شفت وجه القمر...زعلان لو من الخجل
شيّبتي يا غصن الورد...يا مملكه وقادج عبد
هذا الوكت نار وبرد...يا حره لا تستغربي