انتصار الكلمه عالظالم...صعد يخطب جبل هاشم
حچي نار...حچي نار
الى من يسمع اتكلم...أنه ابن الصفه وزمزم
والاطهار...والاطهار

ستّه اعطانه ربنه امن البدايه...حلم عدنه وعلم بيه الكفايه
السماحه والفصاحه لا نهايه...ومحبه امن الله بگلوب البرايه
وشجاعة امحيره الوادم...من جدنه لگمر هاشم
ورث صار...ورث صار
الغيره تنتقل بالدم...أنه ابن الصفه وزمزم
والاطهار...والاطهار

فضلنا بسبع من عدنه نفخر...رسول الله والصديق حيدر
وحمزة الاسد والطيار جعفر...ومن عدنه الامام السبط الاكبر
فخر للعتره والعصمه...عدنه حسين ابو اليمه
والاحرار...والاحرار
ميت راسه يتألم...أنه ابن الصفه وزمزم
والاطهار...والاطهار

ابن مكه ومنى يالتسأل منين...وأنه ابن الوصل للقاب قوسين
أنه جدي يعالم جد الحسين...محمد واحد ولا يوجد اثنين
أنه جدي الذي أسره...ووصل يم منتهى السدره
بالاسرار...بالاسرار
الوحي من عنده يتعلم...أنه ابن الصفه وزمزم
والاطهار...والاطهار

إنه ابن المرتضى امفرق الكتايب...علي برمحين وبسيفين ضارب
همام وصابر ومقدام غاضب...الشباب اليمه يوگف صار شايب
علي بوكت الحرب جدنه...مثل طحن الرحى طحنه
يفقار...يفقار
يطب للموت يتبسم...أنه ابن الصفه وزمزم
والاطهار والاطهار

اختنگ بالعبره وادموعه جريه...أنه ابن السيده الزهره الزجيه
أنه ابن المنكسر ظهره اعله اخيه...أنه ابن المات ضامي وضل رميه
ابوي المنگطع نحره...ابوي المنسحگ صدره
بالانظار...بالانظار
قبل لا اسكن امخيم...أنه ابن الصفه وزمزم
والاطهار...والاطهار

ضجّت بالبچي الوادم والاحزان...مجلس صار عالمذبوح عطشان
يزيد أذَّن وكت مو وكت الآذان...يريد ايسكتك بس انت قرآن
بهوان الدنيه كلمته...بغروره وانته طيحته
عليه عار...عليه عار
الشهاده الاوله هم تعلم...أنه ابن الصفه وزمزم
والاطهار...والاطهار

وصل اشهد محمد من سمعته...محمد جدنه لو جدك سإلته
اذا جدي كلت تفتري انته...واذا بس جدي ليش ابنه ذبحته
بجوابه احتار شيجاوب...ومحمد باجر ايطالب
اله ثار...اله ثار
ويعيده الكلمه بس بالدم...أنه ابن الصفه وزمزم
والاطهار...والاطهار