يشهد يمظلوم...گبرك المهدوم
عن الظلم هذا الأثر...شاهد يظل طول الدهر
گبرك المهدوم

سيرة الهادي المصطفه معروفه جانت سيرتك
هيبة علي عقد الوله بين المجالس هيبتك
ومن الحسن عندك صفه دور السماحه وطيبتك
من والدك ماخذ درس عن العباده وهمتك
تشهد الزهاد...يا زين العباد
منهو المثل صبرك صبر...شاهد يظل طول الدهر
گبرك المهدوم

نورك الخالد بكل زمن رغم العواصف ما طفه
عالدنيه بنواره يشع علم وعباده ومعرفه
عنك يبو الباقر يظل طول الوكت يعكس صفه
منهو الذي شاهد محن مثلك وثابت موقفه
موعظه وإحساس...للشيعه نبراس
ومن عنده نستلهم عبر...شاهد يظل طول الدهر
گبرك المهدوم

للشام إلك موقف نظل طول الدهر نتذكره
عن قدرتك أروع درس للشيعه شيمه ومفخره
بمجلس يزيد اتمكنت يبن النبي بكل مقدره
دمع العيون الحاقده صوت العقيده اتفجره
احتارت الأفكار...وشبحت الأنظار
وللغضب بركان انفجر...شاهد يظل طول الدهر
گبرك المهدوم

يا محنه توصل محنتك يبن الصميده ابكربله
ابهالحاله بعيونك شفت إخوه وعمام امجتله
فوق الرمح راس الابو يبره الضعينه اتصد له
تنظر أطفال امجتفه فوق الهزل والعايله
ما بين الأحزان...ولية العدوان
جدها النبي سيد البشر...شاهد يظل طول الدهر
گبرك المهدوم

منهو الذي مثلك جرع من الدهر مر الصبر
فوق الحزن فوق المرض تنقاد للشام بيسر
وموقف الذوب مهجتك وقام الدمع يهمل جمر
لمن شفتها اعله الحرم تتفرج أصحاب الغدر
اتعاين الأشرار...وبحالك اشصار
دمك عله الوجنه انحدر...شاهد يظل طول الدهر
گبرك المهدوم

اقيود آل أميه الحاقده تركت أثرها برقبتك
ومحنة الشام أكلف بعد أثر وضعها بحالتك
لن بني مروان بحقد دست لك السم غدرتك
وفوق المصايب والمرض يا وسف صابوا جبدتك
قلبك المالوم...جبدك المسموم
عن محنتك ينطي الخبر...شاهد يظل طول الدهر
گبرك المهدوم