آنا العليل المسبي للشام

بين السبايا ودمعي مسفوح...سياط وسلاسل تاخذ الروح
وگبالي راس حسين مذبوح..الهاضمني عمتي شلون تنضام

بلا حيل امشي وتدمع العين..والدم اشوفه بشيبة حسين
ظليت بين الشامت وبين..حسره ودموع وغربه وآلام

القاهرني زينب تمشي وتطيح..صارت مثل سعفه بمهب ريح
عباس خويه ظلت تصيح..الحگلي صرت ابين ظلاَّم

مثل النبل نظرات العيون..شمَّات لو طحنه يضحكون
طول الدرب بينه يشتمون..والسوط يرعب گلب الايتام

ويلي اعله زينب تلطم الراس..كاسر ظهرها فراك عباس
هاي اخت اخوها گالت الناس..صارت سبيه والله ايام

ما هاد جفني ولانمت ليل..ثگل السلاسل ماخذ الحيل
صياح الشمر ومصاهل الخيل..ترعب دليل الرايد ينام

بعيوني ظل حسين مرسوم..وگلبي اعله زينب عمتي ملچوم
اذكرها يم المشرعه تحوم..صاحت گمرها والها ماگام

ياريت عمي الگمر موجود..ويشوف عمتي ودمع الخدود
شاجر گلبها وحيل ممرود..كبَّرها درب الشام چم عام