شصبر يا هلي وطبع الصبر محدود...والمثلي دمعها والحزن مريود

مريود الدمع للفاقده والنوح...أتنطر ضعنكم والنظر مشبوح
وبالضنه البعيده قمت أسلي الروح...أقول الروح بلجي امن الونين اتهود

تهود اشلون روحي وتقطع الونه...لون منكم يهليها قطعت الظنه
لولون يوقع بديها بليل تتعنه...ومن تتبع أثركم توصل المقصود

المقصود التريده الروح شوفتكم...فرقاكم صعب طولة غيبتكم
تيأس لو تظل بأمل جيتكم...تره بآخر نفس يا هلي الروح اتجود

تجود بآخر الأنفاس واتنادي...يا يوم بضعنكم يرجع الحادي
يبشرني بوصلكم وآخذ امرادي...بيكم يا هلي ما ظن زماني ايعود

يعود الزمن بيكم يا هلي هيهات...عفتوني عليله بولية الحسبات
بفراش المنيه و أحسب الساعات...وسّلمت الأمر للخالق المعبود

المعبود بمصابي وحالتي أدره...مكسور الخواطر شنهي اليجبره
واليفقد هله ما ينجبر كسره...يحلالي البجه ولبس الهدوم السود