عاهدناك ... يبن الزچيه
ما ننساك ... يبن الزچيه

هالعهد نافذ يظل طول الدهر...عِشرة امصابك مثل دمع وسهر
إحنه نبض گلوبنه الشبعت قهر...يا شهر عاشور ما مثلك شهر
فيض ادماك ... غيره وحميّه
ما ننساك ... يبن الزچيه

سيدي ومن المدامع ما نمل...هالدموع جروح عالخد تنهمل
من شهر حزنك يبو اليمه يهل...بخيمتك يبن الولي تلم الشمل
عالي الواك ... فوگ الثريه
ما ننساك ... يبن الزچيه

وين مثلك نلگه يبن الزهره وين...جيل يتبع جيل نهتف يا حسين
دمعه وحده بمجلسك تبچيهه عين...كل جهنّم بيهه تطفه باليقين
حبيناك ... دين وقضيّه
ما ننساك ... يبن الزچيه

هالصدور إتْوسّمت بشرف وسام...نلطم اعليهه بمصابك يا إمام
حسين يا موطن عشگنه والغرام...بهالمشاعر نبتدي الشهر الحرام
عد عيناك ... حبك هويه
ما ننساك ... يبن الزچيه

كل مجالسنه ذخر للآخره...عام كامل والخَدَم متحضّره
نظره تكفي نريد من الطاهره...حاضره الزهراء حتماً حاضره
هم تنعاك ... ويّا البريّه
ما ننساك ... يبن الزچيه

يالرُبينه بحبك وفيض الحنان...ما تُفرقنه متاهات الزمان
حسين تبقه بكل زمان وكل مكان...وطن للعاشگ وللخايف أمان
ربنه انطاك ... هاي الهديّه
ما ننساك ... يبن الزچيه

ألف هنياله التشمـله بنظْرِتك...فاز كلمن نذر نفسه الخدمتك
يا أبونه شگد نباهي بهيبتك...إنته خيمتنه وتلمنه خيمتك
كلنا أوياك ... نلتم سويّه
ما ننساك ... يبن الزچيه