مشّايه اعله درب حسين...عن معتقد ممشانه
ومو غالي اعله بو السجاد...بذل النفس وإدمانه
من شان اليحب يبذل لجل المحب ميبالي
وما يبخل ويتعذر لو شاف الثمن غالي
ولو رايد شرف دايم والرايد فخر عالي
لازم بالعزيز ايجود...ويقدر يوصل المقصود
وياخذ مطلبه المريود
دنيه وآخره يربح...ويصبح مرتفع شانه
لو ردنه نقول الموت يكلف والأرواح اعزاز
طبع العمر ما ينراد ذل والظلم واستفزاز
ومن شان الفضل يا ناس لازم بالفضل ينجاز
الرخص من أجلنه الدم...وكلما يمتلك قدّم
راد إلنه الشرف يسلم
واحنه بيمن انجازي...الحته ابطفله جازانه
لو ما سلب جسم حسين جا سلبوا عقيدتنه
ولو ما ينسحق صدره جا سحقوا كرامتنه
ولو ما يرتفع راسه ما ترتفع هامتنه
ونحره الفيّض المصرع...أصبح للعدل منبع
وخل الما سمع يسمع
دين المصطفه المختار...راس حسين قرآنه
مو آية عجب وحده رّتل عالرمح آيات
والذله رفض بيها وتحمل مبدأ الههيات
مات بلعنته الذباح والمذبوح حي ما مات
وهاي المعجزه البرهان...للعنده وعي ووجدان
والطاغي ابن أبو سفيان
خل تنشد عليه وينه...وين الجانت أعوانه
واللي اتعرضوا لحسين ما حصّلوا غير الذل
والماضي اليذكرونه عن موقف المتوكل
وكل ظالم حده حدوه لازم بيه عذاب ايحل
وكلما مرت الأيام...تتهاوه اشكثر أصنام
والحق يفضح الظلام
وأنصار أبو اليمه حسين...طول الدهر ربحانه
من طف كربله لليوم هذا حسين واخباره
وبكل زمن جدامه بسوح الحرب أنصاره
وما غير دربها الخوف ولا زل جدم زواره
وكل عام اليمر ونشوف...تتوافد اصفوف اصفوف
وتقسم لو تروح ازحوف
وحبنه لبو اليمه يزود...اشما كثرت ضحايانه
