هله بجسام...بدر التام...برض الغاضريه
قمر يبن الحسن واتضوي بنوارك...مصباح الجليل الجنته اختارك
الشمعه بيسرتك باليمنه بتّارك
هالبرهان...للشبان...من عندك هديه
يا من صورتك بالحِسن موصوفه...مثل يوسف بين الناس معروفه
يالرايح لبوك اتقبله واتشوفه
يبني أنخاك...إخذ اوياك...من أمك تحيه
يا من بالأخلاق وبالشرف آيه...يبو النفس الأبيه وروح وفّايه
حين الدنقت بالحومه عن غايه
موقف جان...للإيمان...والغيره سجيه
جيش الينحسب آلاف تعداده...جاسم قابله واتوصل امراده
شجاع ومثّل بصولاته أجداده
ظل مشهود...هذا الزود...من حامي الحميه
شاب وبعد عمرك ما وصل عشرين...والحومه تقلبها يسار ايمين
عن عمك تحامي وعن أصول الدين
اتصيح اشلون...أعوف حسين...ما بين آل أمية
أّديت العليك وما عفت عمك...يا جاسم فديته بروحك ودمك
وشقالت بحين الشافتك أمك
طحت وطاح...يا جسام...قلبي اعله الوطيه
