جاسم يسلوة روحي...يحله المصابك نوحي
ليل المعاتب من يجن...والشوفتك گلبي يحن
يحله المصابك نوحي
قلبي من يطفح حنينه يا صبر يقدر ينحره
لو نشد عنك يجاسم شرد أقله وبيش أصبره
ويه كل دقه اليدقها يجذب اعله الماضي حسره
الماضي يوليدي نسيته لو يبعد أمك تذكره
تعب الربه يوليدي...ماي وتبده امن ايدي
جا بعد شتأمل شظن...والشوفتك گلبي يحن
يحله المصابك نوحي
جانت اتراودني فرحه وبحلم عمري قضيته
ورسمك البعيوني عايش هوه سر شوفي لقيته
مهدك الما عفته ساعه وعالمهد قلبي حنيته
وهذا يوم الجنت أعدله يبني وبلهفه تنيته
من بعد صبر أيامي...مزنه وجزت أحلامي
واعليه زخت بالحزن...والشوفتك گلبي يحن
يحله المصابك نوحي
والده وقلبي يجاسم دومه ينبض بالمحنه
ما ظن اضلوعه تلزمه لو رحت يوليدي عنه
وانت شريانه ورفيفه يا عزيزي وقطعه منه
لا تلومه يالجرحته لو بعد ما يخفي ونه
يالبلنفس شاركته...وبأوصافك اتملكته
صورتك آيه امن الحسن...والشوفتك گلبي يحن
يحله المصابك نوحي
عودك بدمعي سقيته ويا وكت يثمر أتاني
وفتحت وردة شبابك ومنها قمت أشتم حناني
توها صاحت بالسعاده ووسفه ذبّلها زماني
ساعة البيها عفتني لو جنت تدري اشدهاني
طير وأحوم ابهمي...والحسره حرقة دمي
واشلون أهود وأستچن...والشوفتك گلبي يحن
يحله المصابك نوحي
عمك اينادي سمعته وجابتك يبني الحميه
خمّدت شمعة زفافك واقصدت سوح المنيه
يا عزيزي وحيرتني بصدت اعيونك عليه
هذا دمعي اليجري من دم لا تظن حنه البِديه
ولنك تقلي اتحني...وضوي الشمع واتهني
والمثلج اعليمن يون...والشوفتك گلبي يحن
يحله المصابك نوحي
يقلها ما يقبل ضميري عمي وحده اشلون أعوفه
والشهم عرسه الشهاده وبالدمه حنة اجفوفه
هاشم وجيش آل أميه ما تخوفني سيوفه
حقي أفرح ساعه وحده ووالدي اليتمني أشوفه
صاحت يجاسم وأمك...تبتلي بهمها وهمك
واشلون يغمض لي جفن...والشوفتك گلبي يحن
يحله المصابك نوحي
الشمس يوليدي تسلم ويه الغروب بسلامه
والظهر شمسك يجاسم سلمت وبيا علامه
امخضبه ابدمك شفتها والجفن ودّع منامه
والوكت يبني هضمني وخيّم اعليه ابظلامه
وعالغبره لمن شفتك...يبني صحت واحضنتك
وفوقك مِلت مثل الغصن...والشوفتك گلبي يحن
يحله المصابك نوحي
