دمعي يجري...وناري تسري
يالرحت من بين إديه...ما أظن ترجع إليه
دمعي يجري...وناري تسري
ودعتك وحيلي انهدم وخنقتني يبني العبره
لو قلبي يا جاسم صخر يتفتت امن الحسره
ولو ما ضلوعه اللزمته طاح القلب عالغبره
يالجنت حاضن دقته من حقه ينفذ صبره
لا تلوعه...ولا تصدعه
يبني ما يحمل أذيه...ما أظن ترجع عليه
يا جاسم وليل الشته الما تنحمل ساعاته
اتنام ويظل يبني القلب يتقالب بحسباته
طير اعله مهدك كل وكت واترفرف اجناحاته
ومن تغفه يتمنه القلب تتوسد بدقاته
يالجذبته...وامتلكته
امقابله صبح ومسيه...ما أظن ترجع عليه
يوليدي قلب الوالده يفيض الحنان اتعرفه
يا جاسم اتنام الخلق ولا يهجع ولا يغفه
كل ساعه ينظر صورتك يتعنه ليك بلهفه
يتمايز بوجهك يظل بدر التمام بوصفه
حقه يسهر...يتنه تكبر
وللعمر رادك تجيه...ما أظن ترجع عليه
تكبر قلت يا سلوتي ذخري جنت متأمله
يوليدي بدموعك ردت لو متت جسمي اتغسله
والجفن بيدك حسبت يوليدي انت اتفصله
وتوقف يجاسم بالدفن وللقبر نعشي اتحمله
جنت اريدك...يبني بيدك
اترابي تهيله عليه...ما أظن ترجع عليه
شمعتك ليش بحسرتي يسلوتي علقوها
يوليدي وبدمع اليكت حنتك هالعجنوها
ولمن وصل ليه الخبر لن هامتك صابوها
يا جاسم اهروش القلب أهل الغدر قطعوها
يبني وسفه...الشمعه تطفه
امنين اجتني الغاضرية...ما أظن ترجع عليه
آنا ادري يبني بغايتك هالليله تنصر عمك
غيرك اشعندي من أمل جاوبني يا بعد أمك
للحومه وياك أعتني ومن توقع أوقع يمك
وبلهفه أضمك للصدر والراس أخضبه ابدمك
أبقه أنوحن...اوياك أروحن
وخل يذبحوني آل أمية...ما أظن ترجع عليه
