[ موشح في المهدي (عج) ]
ما الجرحك مرهم اوعلتك دوه...الاّ يبن العسچري اتزم اللّوه
حيث جرحك ما وجد مثله جرح...اولا مثل دمعك امصب وادي سفح
لا وحگ ونّك وهو الچبدك ملح...ركن ما للدين ظل اله اودوه
ما بگه للدين غير اسمك رسم...وانته عن وجه الارض بعد النجم
ماتراك العين يولا بالحلم...يعرض اخيالك اللّي يغش الضوه
اوهالمراسيل الجنابك وارده...بالعتب تشجي اوتفسر الجامده
ما تحييها ابمناده اولا نده...اولا يبشّرنه منك يوم الهوه
ماسمعنه غایب ابعمر الدهر...غاب مثلك لا رساله اولا خبر
تدري شتگول الديالم والخزر...ما الصاحبكم گضه الوعد النوه
عده اويتهزّون حين اليسمعون...نندب اوننخاك يانور العيون
احنه نتناحب وهم يتضاحكون...من كثر طغيانها اوزود الغوه
آه يبن الحسن صدر الوسع ضاگ...وابركت بهمومنه اظهور النياگ
ياشهر ياحول تغزي اهل العراگ...اوبالغري تصبح اوتمسي ابنينوه
اوتگف لاچن آه بمچان الخيم...اوتذكر اشما صار بيها اعله الحرم
يوم ابن حامي الحمه راعي الشيم...ودّع اوللموت واليهن نوه
آه من حامت علی احسين النسه...تحن لاچن الضمایر یابسه
نادته یمصابك الما ينّسه...زینب اوسبّاح مهجتها التوه
ياعمدنه اوسورنه اوالنه ستر...وبحماك ابنيت لعيالك خدر
يبن والدنه شلك نيّه اوفكر...گال الفراگ اوفلا غيره هوه
كسر خاطرها اوصدع منها الگلب...اومن چبدها اعيونها گامت تصب
چیف رايك يبن چشّاف الكرب...ابهالأطفال المالهم غيرك سوه
بچه اوجاوبها اورجع للعين صب...يختي يرعاكم عگب عيني الرب
غضب لاچن ركب مرتاح الگلب...مثل ما يرتاح مفتون الهوه
