يا بناتي...مدري متغيرات لو متغير انه
يا بناتي...الرمح گاعد بالمكان المو مكانه
يا بناتي .. يا بناتي
ياللي دللتني من خلّص دلالي
بخدي ظل بويه مكان البوسه خالي
انعم الله اعله الرمح يا بويه عالي
و يطمئن اعليجن بكل خطوه بالي
بذكرياتي...خمسه اذكر من وأدري من اذكر قليله
بذكرياتي...سكنه خوله عاتكه رقية العليله
يا بناتي .. يا بناتي
سكنه بويه ليش ما گالولج الناس
على الصار اعله الشريعه فاضت احساس
بعد لا تقرين جيب الماي عباس
مات عمج و البگاله اعله الرمح راس
أمنياتي...جانت اكبر من عطاشه و سالفة ماي
أمنياتي...الشمر واگفلي و اريده يوگف وياي
يا بناتي .. يا بناتي
بالله شخبار العليلة التنتظرني
كسرة العباس مدمعها كسرني
ميت و گالتلي بويه ما تمرني
القهر زينب اسمع تگلي قهرني
من مماتي...هم تجي لو ما تجي خلّص حجيها
من مماتي...بالمدينة و اني دوم اسمع حجيها
يا بناتي .. يا بناتي
غاليه البنت اعله بوها شگد يحبها
شلون إذا گدامه فد واحد ضربها
بنتي خوله تموت عطشانه شذنبها
تشرفت تربة بعلبك من تربها
يا غلاتي...ادري من اتردلي زينب ما تجيني
يا غلاتي...أربعيني بدونها مو اربعيني
يا بناتي .. يا بناتي
عندي موعد بالحلم اوصل رقيه
واعدتها من جنت بالطف رميه
تگله بويه ليش متأخر عليه
يضربوني و على حلگي مخليه اديه
يا آغاتي...الزهره وصتني اعله زينب من مشينه
يا آغاتي...البيها المكفيها ما عايز بجينه
يا بناتي .. يا بناتي
جرد اسماء الضعن جمعة عيوني
مو نفس ما راحوا ايتامي يجوني
شلوني لتقولن يبويه انتو لوني
السبوكم و آنه بترابي سبوني
وي خواتي...ملطخ ابدمي يجي ثوب المن الثوب
وي خواتي...بويه مشتاگتلك اعله الظهر مكتوب
يا بناتي .. يا بناتي
