يا مُصحَف مأساتي...أقراك اِبْآهاتي
شِفتَك آية همِّي...بأبي أنتَ وَأمِّي
يحسين اْو كِل سُوره...تِعْكِسْ للطفْ صُوره
صحْت ابدمعي اْو دمِّي...بأبي أنتَ وَأمِّي
ــــــــــ
ربنه ابْمُصحفه المُنزَل...قصَّة مصرَعَكْ أنزَل
قسَّمها اِعْله آيات اْو سُوَر تروي الرزيَّه
كلما أفتَح المُصحَف...أنظر مشهدِ اِمْن الطَّف
مِنِّ اِلجِلده للجِلده أشوف الغاضريَّه
اِقْريت ( الفاتحه ) ابنُوحي...يالفاتِح جرِح رُوحي
لجْل الـ( قُل هُوَه ) جسمَك هُوَه فوگ الوطيّه

اِعليكِ ( الطـُّور ) اِتفسَّر...و ابدمعاته استَفسَر
هذا ( الطارِق ) مرمي؟...لو سورَة ( و النَّجْمِ ) ؟
اْو ( ياسين ) ابهالوادي...بِسْمَك گام اِيْنادي
يا قرآني المدمي...بأبي أنتَ وَأمِّي
ــــــــ
يـ( المِزَّمِّل ) ابدمَّك...يـ ( المدَّثِّر ) اِبعزمَك
رغْم ( النازِعات ) اللي اسْلبُوا منّك رداءك
من أقره ابـ( قَصَص ) صَبْرك...أتذكر غـُـصَص صدرَك
و اِمْن أقره ( النِّسَاء ) أذكر عله الهزِّل نساءك
راحَن بالسَّبي اْويه الگوم...چَنهِن من سبايه ( الرُّوم )
ابْنيران ( الشِّمس )و العسكر ايفرهِـد خِباءَك

چَـم طفله ابهالهيمه...فرَّت من الخيمه
و اتنادي يا هـظمي...تِچْوي النار ابْجَدمي
( بالدّخّـان ) أتذكّــر...حرْگ اِخيام الخِدَّرْ
اتناديك إطفي اِخْيّمي...بأبي أنتَ و أمي
ــــــــــ
يَمْبَچِّي ( القلَم )و ( النَّون )...و ( الجِّنْ ) گامَوْا اِيوِنَّونْ
اِدموعي ( المُرسلات ) ابهالرزيَّه اِمْن احچي بيها
أحچي ابسورة ( الشُّورَى )...لو خلِّيها مستوره
و ( المُمْتحْنه ) لولا الشورىٰ ما ذِبْحَوْا بَنيها
متجمعه ( الزُمَر ) ضِدَّك...و إنته اعِله التُرُب خدَّك
عَشْرَه ( العادِياتِ ) اْو جثّـتَـك سِحْگوْا عليها

چن زينب گِـدَّامَك...تسمَع طگِّ اِعظامَك
اتصيح ابْدَمْعِ اليِهْمي...فدوَه لعظمَك عظمي
خويه ابعيني اْو شفتَك...الخيل اتگلّب جِثتَك
داسَوْا سوري المَحْمي...بأبي أنتَ و أمّي
ــــــــــــــ
من أقره ( القَمَر ) أنْحَب...أتذكّر گُمَر زينب
و اذكر حَمْلِته عالمَشرعه اِمْن أقره ( القِيَامه )
يومَه ( الواقِعه ) اْو حَلَّت...سيفه ( القارِعه ) اْو نِزْلَتْ
سوَّه ( الزِلزله ) ابْطف كربله مِن شَد لِثامَه
ناره البالحُرُب وَجهَه...يوم اللّي ( عَبَس ) وجْهَه
و اِحصانه ( الرَّعَـد ) و اْعليه لِكد شاهر حُسامه

ضهْضب سيفه اْو دَمْدَمْ...غيمه اْو تمِطرْ بالدَمْ
صاح آنه المِتْسَمَّي...راعي الغيره النّشمي
و اِتْلَفَّتْ لِعْضِيده...گلّه اِمْن ألْزَم صَيده
أذبح و إنته اتسمَّي...بأبي أنتَ و أمّي
ـــــــــــــ
سورة ( طاها )تتكرَّر...من صورة علي الأكبَر
الـ( نور ) اللي ابْـ( مُحمَّد ) كلِّه مجموع ابأصُوله
و اشما أقره بـ( السَّجده )...أذكر سجْدِتَك عنِده
جاعل خدَّكِ اِبْخدَّه اْو تِمدَّدْت اِعله طوله
اِسهامه ( الجاثيه ) ابصدره...اِسيوفه ( الغاشيه ) ابنحره
اْو عن باقي ( الشَّرِح )عاجزِ و لا أگدر أگوله

حچْيِ ( الشُّعَرَا ) أگصَر...من أنْ يِرْثي الأكبر
ناداك اِحضر يمِّي...وإجمَع بيدك جِسمي
فگْد إِبنَك يوم الطًّف...ما مُمكن يتوَصَّفْ
لاچِن إِقبَل نَظمي...بِأبِي أنتَ و أمَّي
ــــــــــ
( الكوثَر ) و ( النَّبأ ) يبچونْ...لِبْنِ ( التِّينِ )و( الزَّيتونْ )
اِمْعـوَّذ بـ ( الفَلَقْ ) نجْل الحَسَن للحومه يِنْـزَفْ
چانت ( مائِدَة ) عِرسه...سيفه اْو لامِتَه اْو تِرْسه
اِعليْه ( الكافِرُون ) ( اتِكاثِرَوْا ) صَفْ يِـتْـبَع ( الصَّفْ )
ثوب لْعِرسه ما فصَّلْ...اِعليْه ( الذَّاريَات ) أجمل
جاسم ( فـُصِّلَتْ ) أچفانه و ابْدمَّه ( تِزَخْرَفْ )

و ( الفجْر ) البِعْيُونه...و( اللّيل ) اِعْله اِمتونه
يسطَع نوره اْو يِعْمِي...و اِعْليْـه اِنهَد عزمي
من طاح اِعله الغبره...و الطّبره اِعله الطبره
صاح أدْرِكني يَعمِّي...بأبي أنتَ و أمّي


ـــــــــــ
( هُود ) اْو ( يونِس ) ابْحَسره...( نُوح )و ( يوسف ) اْبعَبره
اْو باقي ( الأنبياء ) اتْهِل دمعها ابهالفجيعه
و ابحِزْنه النبي ( إبراهِيم )...حگّه اِبهالبراري ايهِيم
ما شايف أبو ذِبْحَوْا عله صدره رضيعه
طفلك يكسِر الخاطر...سهْمَه المُهْجِتَك ( فاطِر )
ابنبلة حرمله اِوْليدك تروَّه مِن نجيعه

من سَهْم اللّي ابْجِيده...گام اِيْفَـرْفِـح بيده
ناداك إشلَع سَهْمي...غارگ بالدَّم نَجْمي
مذبوح ابچـفّـيـنك...يحسين الله ايْعينك
يمسبِّب كِل غمِّي...بأبي أنتَ و امي
_