جعفر الصَّادق من نظر حرگوها للدار
سالت دمِعْته او مُهْجته سِرْحت بـلَـفْـكار
ــــــــــــــــــــــــ
تحچي الروايه عن خبر ما منه أفجـع
عن حادثة حرْگ او جمُر بالمُهجـه تلسع
ما بين ابو الكاظم يصلّي لنّه يسـمـع
صايح يصيح النار وجَّت يبـن لطهار

حيـن اللي تمّم فرضه والناره طفاها
ناح او تحسّـر و احترگ گـلبه ابلظاها
او شـفنه الإمام اتكتّر اوعينه جراها
او روحه الشريفـه هامت ابْعالم الأكدار

لصْحاب إجُـوه او رادو ايعظمون أجـره
گالوله ماهُـو اجديد إذا الطاغي تجرّه
حرْگوها گبل اليوم دار امّك الزهره
إصبر مثل ما صبر گبلك علي الكرار

گال ادري گبلي عالزچيّه حرْگـوْا الباب
وادري مُصاب الزهره أعظم من هلِمْصاب
لاچن يظل منظر أبد عن عـيني ما غاب
ميْصير أبد بعـده ولا گبـله جره او صار

هاجت عليّه احزانّي لمّن شافت العين
من حجره لي حجره غدت تجري النساوين
ذكّرني هالحال ابـْـفـَرَار اطـفال لحْسين
لمّن خيامه اتوجّرت و اشتعلت النار

كل ما أشوفـن نار ترجع بيّه الأياّم
وانظر اگبالي اتراكـضـت بالدهشـه لـيْتام
لا وين تنطي اوجوها الما ظل لها اخيام
والعــسكر اعلها هجَم من كل لـكتار

و الصايح ايْصيح اعله خدْر العيله فرهود
او زين لعْباد ابعلّته بالخيمه موجود
او زينب ابحيره ظلّت او تخمش بلخدود
باليمنه تشگـف ســوطها او تستر بليسار

و أنه حريمي احتارت ابرغـم اهـْيه ويّاي
واشما يصيـر امن الهضـم يبگون بحْـماي
چا شنهو حال اللي بگن تالي بلا رَاي
وحاميهن ابكـثر المرض من علّته اِنهار