هاي أم البنين الطاهره الحره...إلها بالحشر موقف اويه الزهره
لمن رد ضعنها وأقبل الحادي...ورجعت للمدينه عيلة الهادي
طلع بشر بن حذلم ينعه وينادي...اويا أهل المدينه انذبحت العتره
إجت أم البنين وتجري دمع العين...تقله يا بشر إخبرني وين حسين
قال إلها قمر هاشم بلا جفين...وطاح اعله الشريعه ورايته ابكتره
صاحت والدمع مرجان يتنثر...خبر ما جنت عن عباس أتنطر
لا عبدالله لا عثمان ولا جعفر...اخبرني عن أبو اليمه اشجره بأمره
جاوبها ودمع عيناه مثل السيل...خبر عندي اعله أبو اليمه يهد الحيل
انذبح سبط النبي وداست عليه الخيل...واتغسل حسين بفيض دم نحره
صاحت آه يبني يا عمود البيت...قبلك روحي ياخذها الأجل يا ريت
نطيتك أربعه وسالم ترد ظنيت...جاوين انتظاري الجنت أنتظره
لبو اليمه بجت ما بجت للأولاد...ناحت كل عمرها الفقد أبو السجاد
نفس هالموقف ابيوم الحشر ينعاد...وتجي الزهره تحن وبعينها العبره
مشهد بالقيامه اتشوفه كل الناس...تلفي الزهره والوادم تهبط الراس
وترفع بيدها اجفوف القمر عباس...وتصرخ يا إلهي وتجذب الحسره
يا رب ليش هالجفين قطعوها...عين القمر ليش ابسهم صابوها
وليش الهامه بالعامود هشموها...وانت يا إلهي أعلم وأدره
يا أعدل حكم يا ربي يا قيوم...بيني وبين أميه أحكم ابهاليوم
ما أطلب ابضلعي اولا دمه المظلوم...أطلب بالجفوف البقت عالغبره
وكلمن يخدم بمأتم أبو اليمه...وتحضر بالقيامه فاطمه يمه
يا ربي علينه ديم هالنعمه...وهذا الشمل ويه المصطفه اتحشره
