يميتم القرآن...يالذاته من ذاتك
آياته آياتك...تكشف معناتك
يا ساجن السجان...بلذة مناجاتك
من تجري دمعاتك...تكشف معاناتك
لله اشكثر قاسيت...يا راهب أهل البيت
تدعي الله والدمعات تجري اعله خدك
اتقله أرد أكون اوياك وحدي وأعبدك
والله السمع دعواك لا ما يردك
واختار إلك محراب بيه انت وحدك
وسط السجن خلاك...الله بتدابيره
كلما فعل خيره...يالحيرتك حيره
مستانس ببلواك...وانت اعله هالسيره
لا صحبه لا جيره...يالحيرتك حيره
صابر ولا مليت...يا راهب أهل البيت
امن البصره لي بغداد سجنك تنقل
أدري بمماتك جان من سجن اسهل
بس انت ابن حسين حاشه تزلزل
اشما سجنك أصعب صار وجهك تهلل
اشما زادت الأصفاد...والطاغي ديجوره
أكثر صبح جوره...وجهك بزغ نوره
نور الوجه يزداد...من عادت الصوره
جن موسه وبطوره...وجهك بزغ نوره
مثل الكليم احجيت...يا راهب أهل البيت
راضي بقضاء الله أمره اويه نهيه
امن ابن الربيع الفضل ابن يحيه
هالدنيه مهما اتكون تاليها دنيه
لا بيها انت اتموت لا بيها تحيه
عايش لجن مدفون...يالعشيتك موتك
واصياحك اسكوتك...لله ارتفع صوتك
يالشابهت ذا النون...والدنيه تابوتك
لله ارتفع صوتك...والدنيه تابوتك
لا عايش ولا ميت...يا راهب أهل البيت
بس الله يدري اعليك شنهو الذي صار
شنهو اللي شفت ابحيث تدعي ابهالأذكار
بين الرمل والطين يمخلص الأشجار
خلصني من هارون يا رب يا جبار
عندي أهل واعيال...ماذيهم افراقي
من دنيتي اشباقي...مو نشفت ارياقي
وآنا اعله هذا الحال...من شدة اطواقي
ينرض عظم ساقي...مو نشفت ارياقي
شنهو الجرى وونيت...يا راهب أهل البيت
ندري اللي مثلك كون اتخدمه الملائلك
ما يجلس اعله القاع بل عالأرائك
وسفه ومكانك صار بالظلمه حالك
ما يرحم المسجون سندي ابن شاهك
عمدا يجور اعليك...ويشدد بأسره
بس الكلف أمره...من يشتم الزهره
آنا أدري شمأذيك...يالصبرك اشكبره
واتسمعه كل مره...من يشتم الزهره
اشقد للزجية ابجيت...يا راهب أهل البيت
حين الرضه وافاك وكت الوصيه
شاف السبع تمرات بيها المنيه
قلتله بدفنتي القيد خليه بديه
يوم القيامه هناك يشهد إليه
اتموت بسجن هارون...لمن حضر نجلك
شافك وكت غسلك...والسلسله برجلك
جسمك يدفنه اشلون...يالكاظم انسألك
اشلون الرضه ايحملك...والسلسله برجلك
بقيودك اتواريت...يا راهب أهل البيت
دمع القلم واللوح من السمه ايسيل
البيده يدير الكون بيده الزناجيل
والكرسي حقه ايموج بالفاجعه ايميل
اشلون العرش ينشال بأربع حماميل
يا هو اللي مثلك مات...واجفوفه أغلاله
نعشه اعله هالحاله...ما إجه وشاله
بس اللي في الطف بات...متقطعه أوصاله
واتدوسه خياله...محد إجه وشاله
مثل السبط ظليت...يا راهب أهل البيت
