هاوينك يخيمتنه شو نمنه بلا خيمه
خدر قلي جيف أنام يم وادم بلا شيمه
يتيم اعله اليتيم اينام يتيمه اتوسد ايتيمه
صدق بس يتحرك راسي...ها زينب صاحوا حراسي
غافلة الحرس بالليل واجيتك للنهر قوه
دلتني عله امجانك يغالي ريحة الخوه
من شفتك خذاني الخوف قلت بقلبي مو هوه
متغير يا بعد اعيوني...ما ظنك تنشدني اشلوني
السياط اعله اختك امناوب و آنا أتلفت اشعندي
ما ينشلع سوط إعداي إلا بقطعه من جلدي
كلمن ينضرب بالسوط يجي ويلاوذ ابسدي
و السوط يلّزق بمتوني...وانستهم من يشتمووني
سامحني يضي عيناي بكلامي خاف أذيتك
لونك مو أعز مني وحق حسين ما جيتك
حنين و أعرف أطباعك أخوي وبيدي ربيتك
يا خويه الهزل جابوها...وأختك للشام يقودوها
يا سباح قلبي اشبيك اقعد حته نترايه
باجر أركب الناقه وانت ما تجي اويايه
لجن يا هو اليركبني تجرحك هاي الحجايه
منهو الباجر يهتم بينه...وجتال حسين اليحدينه
***
(أبيات ابوذية)
شريد أحجي اعله غيري وله عني...ونين آنه وجراحك وله عني
شمر شتريد مني ولي عني...شفتني ابلا اخو وتجسر عليه
عتابي للكفلني وصله مني...يخي النوح إليه وصله مني
دخلي السوط ياخذ وصله مني...ولا عين الغريب اتصد عليه
بلا خيمه وهوه الغربه تراجف...واخبرك دمعي يم جودك تراجف
بهذا الحر وأحس جسمي تراجف...برد وآنا سعير اخيام بيه
