في شجاعة علي ألأكبر عليه السلام
برز إلى ساحة القتال علي ألأكبر عليه السلام ، أشبه الناس برسول ألله صلى الله عليه وىله وسلم خلقا وخلقا ومنطقا ، هكذا قال عنه أبوه الحسن عليه السلام فقد أبلى بلاءاً حسنا دفاعا عن بيضة ألإسلام الحنيف ، شرع جده المصطفى صلى ألله عليه وآله وسلم الذي هو أولى من الغير في الدفاع عنه وألإستشهاد في سبيله.
جرد صارمه البيه المنايه...ولأمره سلمت كل الروايه
يحسين يحسين...شبلك وجر إبسيفه الميادين
* * * * *
شبلك إتوسط الميدان حليف الغانمه
فرت الفرسان منه حين جرد صارمه
صرخته بالكون صرخة جده حماي الحمه
وجر الحومه إبمرهفه...والفخر رمحه حالفه
من عنده ولت خايفه...إو جدامها بحر الدمه
وين إتروح وبسيفه صگرها...وخيول العده إبصوته حبرها
صفين صفين...حملات الصميده بحرب صفين
* * * * *
گامت الخيل إتعثر فوگ هامات الزلم
إشما جحافلها إتكاثر بيها ألأكبر ما يهم
نزع من عدها النفوس وجسم إعليها الحتم
بالرمح مكتوب ألأجل...يرهب الحومه لو حمل
يشبه لعد خير العمل...من يجسم الفارس جسم
هذا الفرع من ألأصل طيبه...وإسمه تفتخر بيه أرض (طيبه)
نصين نصين...يجسم لو ضرب بالسيف نصين
* * * * *
نعم من شبل أبو اليمه لاح متن أم العله
فو هام الشوس سيفه فرد تسمع ويد إله
چم بطل مطوس إو مدرع سيف عزمه جندله
لمن عن إضراعه سفر...راس إبن غانم من طبر
من شفرة الصارم طفر...ودموعه ظلت سايله
عم الخوف كل قادة العسكر...صگرها إودمرها سيف ألأكبر
للدين للدين...سيفه صار آيه ونصر للدين
* * * * *
لاچن حسين أبو اليمه إعيونه تربي للدرب
لن علي ألأكبر سدر ليه وتنومس بالحرب
طلب شربة ماي منه يبخ نيران الگلب
جاوبه حسين ودمعته...تسچب على إبنه وحالته
الماي آل اميه منعته...دون إبن چشاف الكرب
لمك روح خل يستر گلبها...إيگله وبلچن إيهود نحبها
والعين والعين...ما بطلت تجري دمعة العين
* * * * *
إمنين اجيب الماي يبني يا دليلي ومهجتي
مثل چبدك وحگ جدك يا عزيزي چبدتي
سدر ويسجيك جدك ماي يا ريحانتي
أيس من الماي وسدر...للحرب عنوان الفخر
إمن العطش دلاله إنفطر...وناده إبمحلها ردتي
لأبذل مهجتي وأفني وجودي...بس إيكون أگر عيون عودي
نعمين نعمين...گال وصدگ شبل حسين نعمين
* * * * *
للحرب سدر ولاچن حاله مشرف عالعدام
دارت إعليه ألأعادي إبطعن وإبضرب اللئام
ناده ألأكبر يبو اليمه إعليك من عندي السلام
بويه طحت بين العده...وتواردتني أهل الرده
شوف الجره إعليه وسده...يا چبد سيد ألأنام
رواني وحضر بالماي جدي...گلبك لا يظل يحسين عندي
ظامين ظامين...عودي گتله والرضعان ظامين
* * * * *
من سمع صوته أبو اليمه حسين مسرع ليه لفه
يله يبني ويا عزيزي يا شبيه المصطفى
عگب عينك يا ضوه عيوني على الدنيه العفه
إبطيحتك دلالي إنمرد...من غبت يا بدر السعد
عگبك إصبي عيني إنفگد...والضوه منها إنطفه
إشحاله من شبگ جسمه إو ضمه...لصدره وشاهده إمسبح إبدمه
ماشين ماشين...ناده يولدي بألأثر ماشين
* * * * *
